Osasun mentalari buruzko hitzaldi zikloa antolatuko dute Oiasson
Hilaren 19tik 22ra, 'Osasun mentalak baditu milaka aurpegi' hitzaldi zikloa antolatuko dute laugarrenez; saio guztiak doakoak izango dira.
Osasun mentala izango dute hizketagai Oiasso museoan. Laugarren edizioa izango da aurtengoa, Osasun mentalak baditu milaka aurpegi hitzaldi zikloak lau saio izango ditu. Hilaren 19an, astelehenarekin, hasi eta hilaren 22ra bitarte, osasun mentalak dituen ikuspegiak jorratuko dituzte. Oiasso museoak Biogipuzkoa Osasun Ikerketa Institutuarekin batera, herritarrekin osasun mentalaren gaineko kezkak eta aztertzeko moduak partekatu nahi ditu adituen bidez. Lehen hiru saioak 19:00etan hasiko dira, eta doakoak izango dira. Osteguneko saioa, berriz, 17:00etan izango da.
Ziklo honen helburua da aukera bat eskaintzea osasun-ikerketak eta ezagutza zientifikoak historian zehar gizartearen aurrerabidean izan duten eta izaten jarraitzen duten eragina zabaltzeko. Aurreko edizioetan, zientzia, dibulgazioa, historia eta osasuna landu dituzte. Lanketa hauen bitartez, antolatzaileek azaldu nahi dute ezagutzaren diziplinek errealitatean ezinbestekoak direla eta horiek gure osasunean eragina dutela.
Cristina Ubani eta Rafael Huertas ariko dira lehenengo saioan osasun mentala eta emakumeari buruz hausnartzen eta gogoeta egiten. Asteartean, berriz, Enric Novillaren eta Alvaro Muzquizen txanda izango da; bi adituek psikiatraren historia iznago dute hizpide, bizi duten ondoezan eta traumetan azpimarra eginez. Suizidioa izango da hirugarren eguneko gaia, eta kasu honetan, Cristina Blancoren eta Alex Muelaren arteko elkarrizketa entzun ahalko dute. Zikloari amaiera emateko, hilaren 22an, 17:00etatik aurrera, Why not? elkarteak zuzeneko podkasta grabatuko du.
