Ongizatearen Plazak harrera ona eduki du bi egunetan
Gipuzkoako Foru Aldundiak sustatutako plaza ibiltariak jarduera ugari izan ditu, eta horietara guztietara jende ugari hurbildu da.
Eider Mendoza diputatu nagusiak Ongizate Plazaren gaineko balorazio ona egin du. Bi egunez pertsonen ongizate integrala sustatzeko tailer eta hitzaldi ugari antolatu ditu Gipuzkoako Foru Aldundiak Zabaltza plazan. Gipuzkoako hamar herri bisitatu ondoren, Irunen geldialdia egin du plaza ibiltariak. “Guztion ongizatean eragina duten errealitate berri eta emergenteak plaza ekarri ditugu, elkarrekin hausnartu, elkar entzun, ikasi eta eraikitzeko aukera edukiz”, nabarmendu du Mendozak.
Jendearen erantzunarekin pozik, herritarren esperientzietatik ikasteko aukera izan dutela azpimarratu du. “Orain arteko esperientzia guztiek erakutsi digute gai hauek plazara ekarri behar ditugula, ikusgarri egin, elkarrekin hausnartu, eta aurrerapausoak ematen jarraitzeko”. Hitzaldien, elkarrizketen eta tailerren bidez, ongizatearen arlo ugari landu dituzte.
Bigarren eta azken eguna Anne Otegik, Elikaeneako kideak, Mugarrieta Gandutegiko Ion Areitiorekin batera prestatutako gosari osasuntsu batekin hasi dute. Biek elikadura kontziente eta jasangarria izateko hainbat pauta azaldu dituzte. Ondoren, gazteen txanda izan da. Azken urteotan, sare sozialek ondorio negatiboak sortu dituzte gazteen artean, eta horien gaineko eztabaida izan dute. Gai asko jorratu dituzte: hiperkonexioaren eragina, gaitasun sozialen galera, sare sozialekiko adikzioa edota suizidioa.
Arratsalderako badago zer egin Zabaltza plazan. Cristina Lajas dietista eta nutrizionistak perinomenopausian eta menopausian fokua jarri, eta prozesuan ellikadurak duen garrantzia azalduko du. Hitzaldia 18:00etan hasiko da, eta ordubeteko iraupena izango du. 19:00etan, berriz, Irunera migrazio prozesu baten ondoren etorritakoek euren bizipenak gertutik kontatuko dituzte. Bukatzeko, herritarrek bi egunotan ikasitako plazaratzeko eztabaida irekia izango dute, Txorimaloak Soinu Taldeak eta Elatzetako Kantu Lagunek girotuta.
