Ongizatearen plaza bihurtu dute Zabaltza plaza
Gipuzkoako Foru Aldundiak pertsonen ongizate integrala sustatzeko 'plaza ibiltaria' jarri dute bi egunez Irungo Erdigunean; gaur azken eguna izango da.
Bi egunez ongizatearen plaza da Zabaltza plaza. Atzo, hilak 7, Gipuzkoako Foru Aldundiak pertsonen ongizate integrala sustatzeko “plaza ibiltaria” inauguratu zuten. Gaur ere bertan izango da, eta arratsaldera bitarte, hainbat jarduera antolatuko dituzte. Hilabeteotan Gipuzkoako hamar herritan izan da egitasmo hau, eta Irunen ere geldialdi bat egitearen garrantziaz hitz egin zuten Eider Mendoza diputatu nagusiak eta Nuria Alzaga Irungo alkateordeak: “Garrantzitsua da gai hau Irungo plazaraa ere ekartzea, denon artean bilatu ditzagun erantzunak fenomeno hauen aurrean”.
Egitasmo honen bitartez, gazteen ongizatea, bakardadeak, ariketa fisikoa, elikadura osasuntsua, migrazioa, harrera, tabuak, emakumeen zikloak, integrazioa, heriotza eta dolu prozesuak landuko dituzte. Erronka konplexu honi aurre egiteko modu kolektiboan eta komunitate loturak sustatuz landuko dituzte gaiak. “Irunen egunero lan egiten dugu pertsonei laguntzeko, isolamenduaren prebentzioa, Laguntza gutunak, Gazteekin edo Gurasoekin programekin, besteak beste”, azpimarratu du Alzagak.
Atzo, Adinberri programak hasiera eman zion bi eguneko egitarauari. Iñigo Vicens prestatzaile fisikoak kirol saio irekia egin zuen, eta jarraian, Raquel Rodriguezek eta Naia Rosek mildfulness terapia saioa eta estimulazio kognitiboko tailerra egin zuten, hurrenez hurren. Goizeko bigarren txandan, Itziar Sistiagak Laguntza Gutunak proiektua garatu zuen Irungo Udalaren laguntzarekin.
Arratsaldean, berriz, Endaneak etxe osasuntsuago eta atseginago sortzeko landaregintza tailerra egin zuen. Eguna amaitzeko, 18:00etatik 19:30ak bitarte, heriotza, tabuak eta dolu prozesuak hizpide izan zituen Bidasoa Zurekin elkarteak antolatutako mahai inguruak. Lehen pertsonan bizitako testigantzak ere kontatu zituzten.
Gaur, beste hainbeste jarduera
10:00etan, gosari osasuntsuaren tailerrarekin hasiera eman diote bigarren eta azken egunari. Elikaeneako Anne Otegik, Mugarrieta Ganadutegiko Ion Areitioren laguntzarekin, gosari osasuntsua prestatuko du tokiko eta sasoiko produktuekin. Tripak bete ondoren, gazteen txanda izango da. Sare sozialekiko adikzioa, gaitasun sozialen galera, suizidioa, eta oro har, hiperkonexioaren eraginen gaineko eztabaida egingo dute. Protagonistak gazteak izango dira eta faktore ugari izango dituzte hizketagai.
Bi eguneko jarduna gaur arratsaldean amaituko dute. Cristina Lajas dietista eta nutrizionistak perimenopausia eta menopausian elikaduraren eginkizuna azalduko du, 18:00etatik aurrera. 19:00etatik 20:00etara, migrazio prozesua bizi duten gazteen esperientziak erdigunera ekarriko dituzte, eta Irunera iristeko bidea eta hirian euren lekua aurkitzeko prozesua nolakoa izan den kontatuko dute. Bukatzeko, Txorimaloak Soinu Taldeak eta Elatzetako Kantu Lagunek bi jardunaldien itxiera girotuko dute, herritarrek bi egunetan bizitako esperientziak kontatzen duten bitartean.
