Eduardo Txillidaren eta Remigio Mendibururen arteko elkarrizketa, artelanetan
Erakusketa estreinakoz izango da Irunen; 24 artelan hautatu dituzte, eta 2027ko urtarrilaren 10era ikusgai izango dira, Menchu Gal aretoan.
Ezagunak dira Eduardo Txillida eta Remigio Mendiburu. XX. mendeko bi artista euskaldun handi izan ziren, biak eskultoreak, gainera. Urteetan, balore handiko figura ugari egin zituzten, eta horietatik, 1960ko hamarkadako 24 artelan Menchu Gal aretoan ikusgai izango da datorren urteko urtarrilaren 10era bitarte. Denboraren ispilu erakusketaren lehenengo geldialdia izango da Irun, eta Cristina Labordak abuztuan aurreratu zuen bezala, “benetako plazera da Irunen gisa honetako erakusketa bat antolatzea”.
Ikusgai egongo diren artelanetatik hamabi izango dira Txillidarenak, eta gainontzekoak, Mendibururenak. Aurkezpen ekitaldian, bi eskultoreen senideak izan dira; hala nola, Mikel Txillida, Txillida Leku museoko zuzendaria. Erakusketa honek bi komisario izango ditu: Estela Solana eta Juan Pablo Huercanos. Biek azaldu dute erakusketa honen abiapuntua zein izan den: “Denboraren ispilu, Remigio Mendibururen olerki bat du abiapuntu, eta prozesu eskultorikoaren, denboraren eta kultur testuinguruaren arteko harremanari egiten dio erreferentzia”. Erakusketarekin batera, Maite Zabaletak erakusketaren katalogo berezia diseinatu du, eta 12 euroan dago salgai.
Erakusketak, bi eskultoreen lanek desberdintasunak eduki arren, begirada bateratua eskaintzen du. Materia, espazioa, sormen-prozesua eta artearen, naturaren eta lurraldearen arteko lotura bakoitzak nola ulertzen zuten erakutsiko du. 1960. urte inguruan, Txillida eta Mendiburu azken honek Hondarribian zeukan tailerran elkartu ziren, eta han bertan, Sidney eta A. Lurie Waintrob estatubatuarrek ateratako argazkiak ikusgai izango dira, beste artelanekin batera.
Menchu Gal aretoa ostiraletan eta larunbatetan zabalik egongo da arratsaldez, 18:00etatik 21:00etara; igandeetan, berriz, goizez irekiko dute, 11:30etatik 13:30etara. Gainera, erakusketarekin batera, familientzako tailerrak antolatuko ditu Maushaus arkitektura tailerrak. Guztira, hiru saio egingo dituzte: hilaren 16an, azaroaren 13an eta abenduaren 11n. Udal euskaltegian egingo duten tailerraz gain, bisita gidatu bat egiteko aukera izango dute parte hartzaileek. Jarduera doakoa den arren, aurretik izena eman beharko dute.
Menchu Gal aretoa, euskal sorkuntzaren topagunea
Ez da lehenengo aldia Eduardo Txillidaren zein Remigio Mendibururen artelanak Menchu Gal aretoan ikusgai daudela. Aretoa 2010ean zabaldu zuten, eta hasieratik euskal sorkuntzaren eta artelan garaikideen difusioan jarri du arreta. Zabaldu eta hurrengo urtean, 2011n, Txillidaren erakusketa bat antolatu zuten; eta, 2014an, berriz, Mendibururen txanda izan zen. Oraingo honetan, lehen aldiz, bi eskultoreen artelanak erakusketa berean ikusgai izango dira.
