Feminismoari buruz hausnartzeko ikuspegi poliedrikoa
Urriko eta azaroko ostegunetan, feminismoa hizpide izango duten zortzi hitzaldi antolatuko dituzte Emakumeen Etxean, 18:30etik aurrera.
Urriko zein azaroko programazioan feminismoak txoko berri bat izango du. Irungo Udaleko Berdintasun Zerbitzuak Poliedrikoak hitzaldi zikloa aurkeztu du. Datozen zortzi ostegunetan Irungo Emakumeen Etxean feminismoaren ikuspegi pluralaz aritzeko aukera izango dute. Saioak ordu eta erdikoak izango dira, hain zuzen, 18:30etik 20:00etara. Hitzaldiak doakoak izango dira, plazak bete arte. Gainera, hitzaldiek iraun bitartean haurtzaindegi zerbitzua eskainiko dute 4 eta 12 urte bitarteko haurrentzat. Zerbitzua doakoa izango da, baina aldez aurretik, abisatu beharko dute.
Ziklo honetan, pentsamendu kritiko eta ikuspegi pluralaren bitartez, egungo feminismoan dauden eztabaida esanguratsuenak aztertuko dituzte, “hiri berdinzaleagoa sortzen jarraitzeko”. Hitzaldi hauetan, hainbat arlotako adituek parte hartuko dute, eta espazio ireki batean herritarrekin euren ikuspegiak partekatuko dituzte, etengabe aldatzen ari den gizarte baten erronkak eta eraldaketak jorratzeko.
Lehenengo saioa etzi, hilak 8, izango da. Elisabeth Justicia, irudigile, integratzaile sozial eta ‘Dominga’ pertsonaiaren sortzaileak ‘Adinezko emakumearen (gezurrezko) irudikapena’ jorratuko du. Jarraian, datozen asteetan antolatuko dituzten hitzaldiak:
-
Urriak 15: Raque Ogando, Feministas por la Justicia plataformaren kidea eta aktibista: ‘Feminismoa eta klase-borroka: Bateraezinak al dira?’.
-
Urriak 22: Marta Bustos, dibulgatzailea eta eduki-sortzailea: ‘Filtrorik ez: Sareak, umorea eta desgaitasuna ikusaraztea’.
-
Urriak 29: Clara Serra Sánchez, BAUko Estetikako irakaslea eta idazlea: ‘Baimenaren eremu lausoa’.
-
Azaroak 5: Lidia Falcón, Alderdi Feministaren lehendakaria, abokatua eta idazlea: ‘Hau ez da atzoko kontua: Feminismoaren aurrerapenak, hausteak eta eztabaidak’.
-
Azaroak 12: Ana Cal Estrela, abokatua eta Zapata Boluda bulegoko Zigor Sailaren zuzendaria: ‘Sistema judizialaren (egin gabeko) aurrerapenak’.
-
Azaroak 19: June Fernández, kazetaria eta Hiruki Larroxaren langilea: ‘Desira disidentea: Gozamena arautik haratago’.
-
Azaroak 26: Imane Raissali, psikologoa eta komunikatzailea: ‘Ba al dago denontzat den feminismorik?’.
