"Senegaldarrok anai-arrebak gara, ez dugu istilurik nahi"
Hondarribitarrek Babacar Weleren omenez, beste behin ere, kaleak bete dituzte; justizia eta bakea eskatu dute herritik egindako manifestazioan.
Hondarribiak justizia eskatu du beste behin ere. Ehunka herritarrek senegaldarren komunitateak eta Manko Senegalek deituriko manifestazioarekin bat egin dute. Senegaldarrak buru manifestazioa abiatu dute Babacar Weler hil zuten plazatik, Martxoak 8 plazatik. San Pedro kalea aldarriz eta oihuz bete dute, eta herritik buelta eman ostean, hasierako puntura bueltatu dira. “Babacarrentzat justizia”, oihukatu dute behin eta berriz.
Manifestazioa hasi aurretik minutu bateko isilunea egin dute. Jarraian, Babacarren anaiek hitza hartu dute, eta hunkituta azaldu dute, oraindik ere, ez dutela gertatutakoa sinesten. “Poliziaren dispositiboak huts egin zuen”, adierazi dute. Leku askotatik etorritako senegaldarrak bildu dira gaur Hondarribian: Bilbotik, Gasteiztik, Donibane Lohitzunetik… Bartzelonatik ere etorri dira Babacar Weleren anaiak. “Lehenik eta behin, lurrak Babacar goxo har ditzala eskatzen dugu. Senegaldarrok esker oneko familia bat osatzen dugu, anai arrebak gara. Bakean bizi nahi dugu, ez ditugu istilurik nahi”, azaldu dute senegaldarrek.
Zuloaga kalea eta Itsasargi kalea lotzen duen biribilgunera iritsita manifestariak errepidean eseri dira eta Babacar Weleren argazkian lore eskaintza egin diote. Manifestazioko momentu hunkigarriena izan da, Hondarribia senegaldarron herria ere badela oihukatu dute eserita zeuden herritarrak. Isiltasun minutuak izan dira, eta ondoren bildutako guztiek Txoriak Txori kanta abestu dute ahoz goran.
“Etsituta gaude”
Bide beretik, Binta Sarrek, Manko Senegal elkarteko idazkariak ere bakea eskatu du. “Gure herrian ez dugu indarkeria polizialik nahi. Denok bagenekien Babacarrek osasun arazoak zituela, eta kalea ez zela bere lekua. Poliziak ere egoeraren berri bazuen. Oso egun gogorrak ari dira izaten, ez genuen astelehenekoa gertatzerik nahi. Etsituta gaude. Zazpi udaltzainen artean egoera kontrolatu zezaketen, eta beste bide batzuk erabili bera geldiarazteko”, azaldu du hunkituta.
Bilbotik etorritako Afro Colectiva hedabide antiarrazistako kideak ere bertan izan dira. Azken urteotan, migratzaileen aurkako erasoak eta hilketen berri eman dute. “Kasu hauen guztien atzean arazo estrukturala dago. Kasu hauetan, pertsona beltzek duten probabilitatea handiagoa da, zergatik?”, hausnartzeko galdera egin du hedabidearen sortzaileetako batek. Negarrez pasa dute aste osoa, eta oraindik ere, ez dute poliziak izandako jarrera ulertzen. “Oso nekatuta gaude gure senideen omenez negar egiteaz. Fokua biktimarengan jartzen ari dira uneoro, eta ez poliziak izandako jarreran”, negarrez kontatu du. “Bada garaia jarrera arrazista duten pertsonek jarrera aldatzea, eta arrazismoa gure kaleetatik eta gizartetik ezabatzea”.
Poliziaren operazioa beste behin ere salatu dute, eta manifestazioan zehar ozen azaldu dute Babacarrena ez dela hilketa bat izan; erailketa bat baizik. “Bizitza duin baten bila gatoz, hondarribitarrek ez gaituzte diskriminatu. Babacarren erailketaren atzean goiko postuen arazo bat dago, eta ziur gaude pertsona zuria izango balitz, ez zuketela horrela jokatuko”.
Eskerrik beroenak eman dizkie hondarribiarrei, eta argi eta garbi adierazi dute beraiek ere hondarribitarrak sentitzen direla. “28 urte daramatzat hemen bizitzen, herritar bat gehiago naiz. Nire seme-alabak Hondarribian hazi dira, eta euren lagun kuadrila hemengoa da”, azaldu du Babacarren senideak. Bakea eta justizia eskatuz amaitu dute gaurko manifestazioa.
HITZAk gaur arratsaldeko manifestazioaren jarraipena egin du. Hona hemen, manifestazioan ateratako argazkiak:
