Euskara sustatzeko, lore jokoak
Dantza eta kantua ardatz duten jardunaldiak antolatuko ditu Bidasoa Txingudi Partzuergoak hilaren 5etik 10era bitarte.
Euskara bertako hizkuntza dela aldarrikatzeko eta haren erabilera sustatzeko Bidasoa Txingudi Mugaz Gaindiko Partzuergoak Lore Jokoak jardunaldiak aurkeztu ditu. Datorren astelehenean, hilak 5, hasi eta ostegunera bitarte, dantza eta kantua ardatz duten jardunaldiak antolatuko dituzte Irunen. Euskaraz sozializatzea izango dute hellburu egunotan egingo diren hitzaldi zein jarduerak.
Datorren larunbata, hilak 10, egun handia izango da. Egun osoko egitaraua antolatuko dute Sarjia parkearen eta Istillaga plazaren inguruan. 12:00etan hasita, kantu jira egingo dute. Kalez kale ariko dira kantuan auzoa alaitzen. Arratsalderako programatutako jarduerak Istillaga plazako frontoian egingo dira. 18:30ean, Irunabarreko eta Hendaiako bertso eskolako bertsolariek oholtzara igo eta bertsotan izango dira. Eta hura amaitu eta berehala, 20:30ean, muxikoen eta Jeiki Hadi eromeriaren txanda izango da.
Larunbata egun handia bada ere, astean zehar hainbat hitzaldi antolatuko dituzte Palmera Monteron. Astelehenean, Antxoka Agirrek bertsolaritza modernoaren big bang-a izango du hizketagai, 19:00etan hasita. Astearteko hitzaldia ere leku berean izango da, baina ordubete beranduago hasiko da, 20:00etan. Kasu honetan, Ostomila taldeko txotxongiloak izango dira protagonistak, eta Ruben Mejutok sektoreak bizi duen egoera azalduko du. Asteazkenean, liburu aurkezpen bat egingo dute, 19:00etan. Garikoitz Goikoetxeak berriki argitaratutako Esnatu ala hil liburua aurkeztuko du, 18:00etatik aurrera. Euskararen gaur egungo egoerarekin jarraituz, Siadecok aurten lantzen ari den ikerketaren berri emango du: Norantz doa euskara? Hego Euskal Herria 2026: Proiekzio demolinguistikoa.
Ostiraleko hitzaldia, berriz, ez dute Palmera Monteron antolatuko, Amaia KZra lekualdatuko dute. 19:00etatik aurrera, Txalo Produkzioak Trajea antzezlana aurkeztuko du. Joseba Apaolazak eta Asier Hormaza merkealdietan murgilduko dira antzezlan honetan. Sarrera doakoa izango da baina udal webgunearen bitartez, gonbidapena eskuratu beharko dute.
