Protokoloa jarraituz, zerbitzuz kanpo utzi dute Babacarri tiro egin zion udaltzaina
Ez da diziplinazko prozedura baten ondorioa. Haren arma ere ikerketapean dago. Euspel sindikatua gertaeraz mintzatu da.
Euspel polizia sindikatua asteleheneko gertakarietaz adierazi da, azalduz zerbitzuz kanpo gelditu dela tiro egin zuen udaltzaina, protokoloak horrela eskatzen duelako. Ez da diziplinazko prozedura baten ondorioa. Bere arma ere kendu egin zaio, ikerketan beharrezkoa baita. Ertzaintzaren eskuetan dago astelehenetik ikerketa, eta Irungo auzitegiak hartuko du ardura, adieraziz ea polizia agenteen jarduna egokia ala desegokia izan zen. “Alboan zuen ertzaina salbatzea izan zen udaltzaingoaren asmo bakarra”, adierazi du sindikatuak.
Udaltzainaren defentsa haren gain hartu du Euspelek, eta haien babes guztia helarazi diote. “Ertzainaren bizitza arriskuan zegoela ikusi zuen, eta hor erabaki zuen tiro egitea. Asmoa hori izan arren, zoritxarra da pertsona bat hil izana”, esan du sindikatuak. Horrez gain, adierazi dute Hondarribiko Udalaren ardura dela haren herriko udaltzaingoen formakuntza jarraian eskua hartzea, eta poliziak hobe ekipatzea. “Udalaren ardura da borraren eta suzko armaren artean beste baliabide batzuk egotea”, esan du sindikatuak.
Udaltzaingoari zerbitzu psikologikoak eskaini zaizkio, sindikatuaren eta udalaren eskutik. “Inor ez dago prestatuta norbaiti bizitza kentzeko, hori soilik psikopatek egin dezakete normaltasunez. Gertakaritik, haren alboan egon gara, eta egongo gara”, esan du sindikatuak. Horrelako kasuetan, sindikatuak azaldu duenez, polizia agenteari baja edo oporrak hartzea eskaintzen zaio, ikerketak aurrera egin arte. Euspelek adierazi du ez dakitela zehazki ze formula erabili duen Hondarribiko Udaltzaingoak.
