Poliziaren jardueraz, gertakaria eragin zuten inguruabarrez eta aurrekariez ikerketa zorrotza eskatu du ELAk
Funtsezkoa jo du ELA sindikatuak, zerbitzu publikoek gardentasunez jokatzea "herritarren errespetua eta konfiantza izango badute".
Babacar Welerren hilketaren harira iritzia eman du ELA sindikatuak. Ikerketa zorrotza eskatu du sindikatuak, “haren heriotza argitzeko, poliziaren jardueraren gainekoa zein gertakaria eragin zuten inguruabar eta aurrekariez”. Funtsezkoa jo du halaber, zerbitzu publikoek gardentasunez jokatzea “herritarren errespetua eta konfiantza izango badute”.
Hondarribian astelehenean gertatua ez dela egoera isolatua jarri du nabarmen, eta gogora ekarri du Santurtzin ekainean gertatua —30 urteko Ander hil zen Udaltzainek atxilotu eta bi egunera—: “Han bezala, hemen ere, hildakoak osasun mentaleko arazoak zituen. Bi kasuetan udaltzainek, aurrez ere, hildakoekin harremana izan zuten”. Jarraian, segurtasun eredua “birpentsatzeko” eztabaidari heltzeko eskatu du ELAk, eta nabarmen jarri, aspaldian ohartarazi duela sindikatu korporatiboek segurtasun ereduaren ikuskera okerra bultzatzen ari direla, “horretarako gobernuen eta eskuineko alderdien oniritzia jaso dute”.
Hondarribiko gertakariak zein Santurtzikoak inoiz baino ageriago jarri dute segurtasun ereduaren gainean hausnartzeko beharra ELArentzat, “lehenbailehen jo behar dugu bestelako segurtasun sistema baterantz: publikoa, orokorra, prebentiboa eta foku anitzekoa”. Horrek politika publiko sendoak eskatzen dituela esan du, “koordinazio tresna, protokolo, eta sistemak barne”.
Beste erpin bat ere sartu du ekuazioan sindikatuak, gizarte eta osasun zerbitzu publikoak, “egoera hauei langile eta bitarteko nahikoekin heltzeko, diagnostiko eta tratamendu egokiekin eta ardatza prebentzioan jarrita”.
Hori horrela, hainbat eztabaida zabaldu beharra nabarmendu du: poliziari eta gainerako zerbitzu publikoei segurtasun publikoan dagokien eginkizuna; poliziak jaso behar duen trebakuntza; eta poliziak suzko armak, dispositibo estatikoak, edota pistola elektronikoak nola erabili behar dituen.
