Maskulinitatea pantailetara eramango dute
Urriko asteazkenetan, 18:30ean, maskulinitatea lantzeko zinema zikloa antolatuko dute; proiekzioekin batera, protagonistekin solasaldiak izango dira.
Urriko asteazkenetan maskullinitatea lantzeko hitzordua izango dute Amaia KZn. Maskulinitateari buruzko zinema zikloa antolatuko dute, eta maskulinitatea bizitzeko eta ulertzeko moduen gainean hausnartuko dute. Saioak 18:30ean hasiko dira, eta Patxi Perez aktore irundarra izango da dinamizatzailea. Guztira lau film proiektatuko dituzte: Ander, Close, American History X eta Ayer no termina nunca. Sarrerak doakoak izango dira, eta udal webgunearen bitartez eskuratu beharko dituzte gonbidapenak.
Filma hauen bidez, emozioak esploratu eta estereotipoak zalantzan jartzera bideratuko dituzte ikus entzuleak. Ziklo honen helburua galderak egitea eta jakinminaren, entzutearen eta pentsamendu kritikoaren bidez elkarrizketa sustatzea da. “Beti esan dugu benetako berdintasuna lortzeko borroka gizonen zein emakumeen borroka dela. Hala, ziklo berri honekin, maskulinitateei buruz askotariko ikuspegitatik hitz egiteko espazioa sortuko dugu, baina, batez ere, gai horren inguruko hausnarketa sustatzeko”, adierazi du Maite Cortinak, Berdintasuneko eta LGTBIQ+ Eskubideetako ordezkariak.
Lehenengo hitzordua datorren asteazkenean, urriak 7, izango da. Ander filma proiektatuko dute, eta proiekzioaren ondoren Josean Bengoetxea aktorearekin hitz egiteko aukera izango dute bertaratzen direnek. Film hau 2009an estreinatu zen, eta homosexualitatea jorratu zuen lehenengo pelikula euskalduna izan zen. Urriaren 14an, Close proiektatuko dute. Kasu honetan, 13 urteko bi gazte banaezinen arteko harremana izango dute hizpide.
Azken bi filmak American History X eta Ayer no termina nunca izango dira. Lehenengoa urriaren 21ean proiektatuko dute, eta espetxetik atera ondoren, gazte batek nazismotik aldentzeko egin dituen urratsak azalduko ditu. Azken filma, berriz, urriaren 28an proiektatuko dute; istorio intimo eta emozional baten bueltan eraikitako istorioa kontatuko du.
