"Denoi komeni zaigu zehaztasunez jakitea zer gertatu zen"
Igor Enparan alkatearekin izan da HITZA. Senegaldar komunitatearekin eta kontsularekin bildu zen atzo, eta dena argitzeko haren konpromisoa helarazi zien. Agintaldiko momenturik gogorrena honakoa dela azaldu du.
Enparan, artxiboko argazki batean. Buru-belarri ari dira udal langileak astelehenean gertatutakoaren harira lanean. Astelehenean bertan krisi kabinete bat sortu zutela adierazi du Igor Enparan alkateak. Atzo, senegaldar komunitatearekin, kontsularekin eta Babacar Welerren senideekin bildu zen. Egoera argitzeko konpromisoa erakutsi zien, eta horren harira, ikerketa egiteko batzorde independente baten sorrera eskatu du alkateak, “gardentasunez eta berme guztiekin” jokatzeko.
Atzo adierazi zenuen agintaldiko egunik zailenak ari direla izaten.
Zalantzarik gabe horrela da. Inork ez nau prestatzen, eta inork ez gaitu prestatzen administrazio publikoan ari garenoi horrelako egoera baten aurrean jarduteko. Oso egun gogorrak izaten ari dira, bai.
Kontsularekin bildu zineten atzo. Nolakoa izan zen bilera?
Atzo Senegalgo kontsul etxetik eskaera bat jaso genuen, esanez herrira zetozela eta nirekin elkartu nahi zutela. Arratsaldeko lehen orduan elkartu ginen, kontsularekin, eta baita Babacarren senitarteko eta komunitate senegaldarreko ordezkariekin ere. Genuen samina eta atsekabea haiekin konpartitzeko baliatu genuen bilera, baina baita elkartasuna adierazteko ere, eta noski, haiei entzuteko. Niretzat garrantzitsua izan zen haiek entzutea, haiek duten mina gurea baino askoz handiagoa baita.
Justizia eskatu zidaten, behar beharrezkoa ikusten dutelako. Nire aldetik, udalaren konpromisoa erakutsi nien gertatutakoa argitzeko. Bide judiziala aurrera doa, eta ikerketa martxan dago. Horrez gain, batzorde independente bat sortuko da, beste ikerketa bat abiatzeko, gardentasunez eta berme guztiekin. Gure aldetik lankidetzan arituko garela adierazi nien, ikerketa horietan aurrera joateko, eta justiziarekin kolaborazioan izateko.
Hondarribiko Udaltzaingoak egin zuen tiro. Udalaren langileak diren heinean, zer nolako ardura sentitzen duzue gertatutakoan?
Kasu honetan esan behar dut alkatea dela Udaltzaingoaren organo nagusia, eta Hondarribiko Udaleko langileak diren heinean, ni naiz egoera honen guztiaren arduradun nagusia zalantzarik gabe. Horregatik, lehenengo momentutik krisi kabinete bat sortu genuen. Uste dugu gertatutakoa argitzea ezinbestekoa dela ea erabilitako jardunak egokiak izan ote ziren, eta udaltzaina nire lankide den heinean badaukat harekiko errespetua, baina uste dut egoera argitzea langile horrentzat ere baliozkoa izango dela.
Gure eskuan dagoen guztia egiten ari gara, eta senegaldar komunitatearekin izandako bileran erakutsitako konpromisoaren harira eskatu dugu batzorde independentearen sorrera eta gertakari guztien argipena. Denoi komeni zaigu zehaztasunez jakitea zer gertatu zen.
Atzo esan zenuten hau ekidin zitekeela sentitzen zenutela. Zertaz ari zarete: astelehenekoaz ala aurretik egin beharreko lan guztiaz?
Astelehenean gertatutakoa egoera baten ibilbidearen azken urrats tamalgarriena izan zen. Babacar Hondarribian ezaguna zen pertsona bat zen, eta gizarte zerbitzuetatik ere laguntza eskaintzen ari zen udala, duela urtebetetik. Osasun mental arazoak zituen horretan jarraipen lanketa bat egiten ari ziren Hondarribiko Udaleko gizarte zerbitzuak, baina baita Gipuzkoako Foru Aldundiaren zerbitzuak eta osasun mentaleko departamentuak ere. Horregatik uste dut ekidin beharrekoa astelehenean gertatutakora iristea zela.
Lanketa horretan ari baginen ere, nire atsekabea bada ez dugula asmatu koordinazioan, eta gizarte bezala ez ditugula tresna egokiak aurkitzen osasun mentaleko arazoak dituzten pertsonei aukerak ematerako garaian. Ikuspegi horretatik egin nituen adierazpen horiek, uste dut-eta urtebeteko epean eta erakunde ezberdinak lanketa honetan egonda, hau ekidin zitekeela. Behintzat espero dut aurrera begira ikasteko eta erakundeen arteko lanketan finago aritzeko balio izango digula.
Ehunka pertsona bildu ziren atzo senegaldar komunitateari babesa emateko.
Argi dago senegaldar komunitateak duen tristura eta mina askoz handiagoa dela, haiek gertutik ezagutzen baitzuten Babacar. Herriaren parte dira, eta beraz, beste herritarrekin, haien min hori adierazteko espazioa behar zuten, horrela ulertzen dut nik manifestazioa. Niri justiziaren beharra transmititu zidaten behin eta berriz, eta ez dadila gertatutakoa ahanzturan geratu. Baina adierazi nahi dut ere esker ona erakutsi zigutela, azken urteetan udalaren eta senegaldar komunitatearen artean lankidetza jarraitu bat izaten ari gara-eta, eta horren kontziente badirelako. Hondarribian betidanik oso eroso sentitu direla adierazi nahi izan zidaten, eta horrela jarraitu nahi dutela.
