Zorroztasuna, gardentasuna eta erantzukizun instituzionala eskatu ditu Hondarribiko EAJk
Hausnarketarako tartea eskatu du alderdiak: "Gertatutakoa aztertu behar dugu, gabeziak non egon diren argitu eta horrelako egoerak berriro gerta ez daitezen beharrezko neurriak hartu".
Babacar Wele oroitzeko lore sortak eta kandelak, atzo, Hondarribian. Asteleheneko Babacar Weleren hilketaren harira iritzia eman du Hondarribiko EAJk. Hildakoaren familiari eta gertukoei doluminak eman eta babes osoa adierazi diete, “Senegalgo komunitatearen mina partekatzen dugu. urte luzez gure herrian integratuta dagoen komunitatea da, eta gure herriaren parte da”. Jeltzaleek adierazi dute orain “batasunerako, errespeturako eta bizikidetzarako” deia egitea beharrezkoa dela, dolurako tartea utziz eta sufrimendua areagotu dezaketen jarrerak saihestuz. Aldi berean, gaiaren gaineko zorroztasuna, gardentasuna eta erantzukizun instituzionala eskatu ditu.
Hausnarketarako tartea eskatu du EAJk. “Argi dago babes eta arreta katean zerbaitek huts egin duela, gizarte baliabideetatik eta erakundeetatik hasi eta arlo judizialera arte. Gertatutakoa aztertu behar dugu, gabeziak non egon diren argitu eta horrelako egoerak berriro gerta ez daitezen beharrezko neurriak hartu”.
Era berean Udaltzaingoari eta Ertzaintzari aitortza egin die alderdiak, “herritar guztien segurtasuna bermatzeko lan egiten baitute”. Gertakarien egunean hainbat orduz kalean “tentsio eta arrisku” egoera bizi izan zela zehaztu dute jeltzaleek, eta agenteek “beren osotasun fisioa zein inguruko pertsonena babesteko” eskubidea dutela azaldu du. Gertatutakoaren ikerketa abian du Ertzaintzak, “jardun zehatza zorrotz argitu behar da”.
Gorrotoaren eta populismoaren aurrean, zuhurtzia eta erantzukizuna aldarrikatu ditu alderdiak: “Mina, ziurgabetasuna eta tentsioa nagusi diren uneak muturreko ideiek, gorroto- diskurtsoek eta populismoek gertatutakoa baliatzeko giro aproposa bihur daitezke. Ezin dugu hori onartu, ezta horretan lagundu ere”. Hala, herritarrek “informazio zorrotza, errespetua eta erantzikuzuna” merezi dituztela berretsi du, “eta ez konfrontazioa elikatzen edo ondorioak aurrez ematen dituzten mezuak. Lasaitasunez jokatzeko unea da”.
Arlo politikotik eta erakundeetatik ere erantzukizuna, gardentasuna eta ikerketarekiko konfiantza eskatu ditu EAJk. Alta, “kezka” azaldu du “udal gobernuko kide den alderdi batek” protesta mobilizazioak “sustatu” omen dituelako, “gertatutakoa polizia hilketa gisa aurkeztuz ikerketa argitu aurretik”. Horren aurrean jeltzaleek adierazi dute ezin direla ikerketa bukatu aurretik “larritasun horretako” baieztapenik egin, “are gutxiago Udaltzaingoaren gaineko erantzukizun politikoa duen alderdi batetik datorrenean”.
