Argitaratu dituzte 2027ko aurrekontu parte hartzaileen proposamen finalistak
Prozesu orokorreko 20 proposamen eta gazteen 22 proposamen izan dira bozkatuenak; azken bozketa urriaren 2tik 6ra izango da.
2027ko aurrekontu parte hartzailearen proposamen finalak zeintzuk diren jakinarazi du Irungo Udalak. Herenegun eta atzo artean, aurkeztutako proposamenen artean bozkatzeko tartea izan zuten herritarrek, azken bozketara pasako diren 20 proposamenak zeintzuk izango diren erabakitzeko. Aurten, gainera, iaz baino jende gehiagok parte hartu du bozketan; orotara, 3.276 boto (iaz baino 247 gehiago). Prozesu orokorreko finalera 20 proposamen iritsi dira; gazteen prozesuko finalera, berriz, 22 proposamen. Urriaren 2tik 6ra bitarte, azken bozketa egiteko txanda edukiko dute.
Udalak 1.500.000 euro gorde ditu herritarrentzat. Horietatik, 1.300.000 euro prozesu orokorreraa bideratuko dira; eta beste 200.000 euroak hiriko gazteen proposamenetarako. Egun hauetan zehar boto kopuru handiena lortu duten proposamenak udal webgunean kontsulta daitezke.
Ostiralean azken bozketa martxan jarriko dute, eta asteartera bitarte zabalik egongo da. Udal webgunearen bidez edota HAZen bulegoetan eta adinekoen espazioetan bozkatzeko aukera izango dute. Ostiralerako aurreikusitako karpa informatiboa atzeratu egin dute, kuadeketa arrazoiak direla eta. Datorren astelehenean, urriak 5, antolatuko dute Zabaltza plazan, 18:00etatik 20:00etara.
