Senegalgo komunitateak mobilizazioa egingo du arratsaldean
Hondarribiko udaltzain batek atzo Babacar Welle hil zuelako martxa egingo dute, 17:00etan hasita.
Babacar Welle 46 urteko senegaldar jatorriko hondarribiarra hil zuen atzo arratsaldean pistola tiroz herriko udaltzain batek. Eusko Jaurlaritzako Segurtasun Sailak atzo bertan zehaztu zuen gizonak arma zuri bat zeramala, eta harekin mehatxu egin zien San Pedro kaleko ostatu batean zeudenei. Ostatuan zirenen deia jasota, haraino bertaratu ziren Udaltzaingoko eta Ertzaintzako agenteak. Zuloaga, Matxin de Arzu eta Itsasargi kaleak batzen dituen biribilgunean atzeman zuten gizonezkoa. Eta esku hartu zuten poliziak gizonak bere jarrera alda zezan saiatu ziren, baina ez dute lortu. Segurtasun Sailaren arabera, gizona behin baino gehiagotan saiatu da Irungo ertzain etxeko kide bat zauritzen, eta udaltzainak arma erabili zuen erasoari aurre egiteko. Lekukoen arabera poliziak hirutan egin zuen tiro. Horren harira, Hondarribiko senegaldarren komunitateak mobilizazioa deitu du gaur (asteartea) arratsalderako. 17:00etan hasiko da, Martxoak 8 plazatik.
Antxeta Irratiak jakinarazi du Donostiako Klinika Psikiatrikoan hainbatetan artatu behar izan zuten Babacar Welle. Bestalde, Irungo Zubia gizarteratze zentroko erabiltzaile ohia zen, eta duela urtebete Grupo Campezo enpresan lan egin zuen hildakoak, orduan pairatzen zituen buruko nahasmenduak medikazioari esker kontrolatuak zituela.
Azken aldian, Antxeta Irratiak zehaztu duenez, kale egoeran aurkitzen zen, eta botika hartzeari utzita osasun mental arazo larriak zituen. Segurtasun Sailak atzo jakinarazi zuen 12 alditan atxilotu zuela Ertzaintzak, eta haren gaineko 10 ikerketa abiatu zituela. Atzo pasatakoa ikertzen ari da aldi berean Ertzaintza.
