Musikak Mendibileko parkea beteko du igandean
Hamabigarren edizioaren hirugarren eta azken saioa izango da, eta egun osorako egitaraua antolatu dute kontzertu eta tailerren bidez.
Irungo Udalak eta Txikis del Bidasoa elkarteak amaiera emango diote Girabira programaren hamabigarren edizioari. Igande honetan, urriak 4, Mendibil parkea familien elkargunea bihurtuko da, eta egun osorako egitaraua aurkeztu dute. Musika eta haurrak izango dira eguneko protagonistak, eta kontzertua zein bestelako tailerrak antolatuko dituzte. 12:30etik 17:00era zer egin izango dute Udal Kontserbatorioa dagoen parkearen eremuan.
Programaren egitura finkoa da, eta saio bakoitzean ikuskizunak, tailerrak eta indarra hartzeko piknika antolatzen dituzte hiriko parkeetan. Oraingo honetan, Mendibil parkean antolatuko dituzte jarduerak; euria egingo balu, plan alternatibo bat antolatuko dute.
Swingtronics taldeak swing eta elektronika uztartzen dituen kontzertu bat eskainiko du egunari hasiera emateko. Kontzertua amaituta, bakoitzak etxetik ekarritako bazkariarekin piknika egingo dute. Azken saio honetan, gainera, taberna bat jarriko dute parkean, eta aukera izango dute edariak edota bokatak erosteko.
“Girabirak gure eguneroko bizitzaren parte diren espazioak berraurkitzeko aukera ematen digu, beste modu batean bizi ditzagun. Hamabi edizio egin ditugu jada, eta, beraz, hainbat umek arratsalde horiekin hazten ari dira: manta belarraren gainean, merienda, lagunekin elkartzea, tailerretan parte hartzea, edota emanaldi bat elkarrekin ikustea”, adierazi du Nuria Alzaga Kulturako ordezkariak.
Arratsaldean, tailerrak
Girabiraren ardatz nagusia tailerrak izaten dira, eta beste saioetan egin bezala, bazkalostean antolatuko dituzte. Skola Musik, Taupa! Musikarekin Hazten, Marte Sorkuntza Laborategia eta Ekoetxea Txingudi taldeek antolatuko dituzte. 14:30etik 16:30era, musika ezagutzeko taillerrez gozatzeko tartea edukiko dute. Tailerretan parte hartzeko ez dute aurretik izena eman beharko, tailerrak libreak izango dira.
Eguna borobiltzeko, Skola Musikek batukada irekia antolatuko du 17:00ak bitarte. Tailerretan ikasitako erritmoak praktikan jartzeko eta tailerretan sortutako musika tresnak erabiltzeko aukera izango dute 30 minutuko saioan.
