Junkaleko etxeen barnealdeko plaza berrituko dute
Gipuzkoa eta Elizatxo hiribideen arteko espazio publikoa hobetuko dute; irisgarriagoa izango da eta plazako jolastokia handituko dute datozen hilabeteetan.
2022ko Herritarren Segurtasunaren eta Bizikidetzaren aldeko itunean zehaztu moduan, Junkal etxeen barnealdeko plaza berrituko dute datozen hiru hilabeteetan. Gipuzkoa eta Elizatxo hiribideen arteko plaza hobetuko dute irisgarriagoa izan dadin. Eguneratuta ez dauden hiri elementuak berritzeaz gain, plazako jolastokia handituko dute goiko aldeko zurezko banku luzea kenduta. Etorkizunean parke izaera handiagoa izango du plazak, eta haurrentzako eremu berria zurezko hesi batez inguratuta egongo da.
Honela, plazako irudi urbanoa hobetu, eta argiteria eta bestelako elementuak konponduko dituzte. Berritze lanen ondorioz, goiko eta beheko eremuak lotuko dituzte, eta bi aldeek dinamismoa izango dute, eta elkarri lotuta egongo dira. Berritze lanek 226.721,94 euroko aurrekontua izango dute, eta hiru hilabeteko epea izango dute.
