'Adinekoak Gogoz' programa, urteetako lanaren omenez
Datorren urriaren 1etik 8ra adinekoen astea egingo dute, Adinekoen Nazioarteko egunaren harira. Hamaika ekintza antolatu dituzte, izan hitzaldia izan dantzaldiak edota bizikleta ikastaroa.
“Irun zuhaitz handi bat izango balitz, gure adineko herritarrak haren sustraiak lirateke. Nortasuna ematen diote hiriari”. Hala adierazi du Cristina Laborda Irungo alkateak, adineko herritarei erreferentzia eginez, atzean dituen adinekoek adi-adi entzuten dioten bitartean. Astebete besterik ez da falta Adinekoen Nazioarteko Egunerako. Egun handiaren harira, adinekoei bideratutako hamaika ekintza prestatu ditu udalak eta ‘Adinekoak Gogoz’ programan bildu ditu. Gaur goizean, hilak 24, aurkeztu dute Zabaltza plazan, Laborda alkateak, Josu Iguiñiz Gizarte Ongizateko ordezkariak eta adinekoen elkarte desberdinetako bozeramaileek.
“Aste hau aukera bat da ezagutzeko, baina baita entzuteko, partekatzeko eta haiengandik ikasten jarraitzeko ere. Izan ere, gure adinekoak zaintzea eta balioestea Irungo nortasuna zaintzea eta balioestea ere bada”, esan du Labordak. “Astea adineko pertsonek dituzten beharrak eta eskaerak aldarrikatzeko eta kolektiboa bera ikusgarria egiteko da”, gehitu du Iguiñizek. Izan ere, zehaztu du hiriko biztanleriaren %24 direla eta “lan handia” egiten dutela harengatik.
Ekintza sorta handia
Askotariko ekintzak antolatu dituzte adinekoen asterako. Urriaren 1ean hasiko da; ekitaldia egingo du Amaia KZ gunean adinekoen eguna ospatzeko. Adinekoen Gizarte Etxeetako taldeek eta Gure Altxor, Betiko Ametsa eta Nagusilan elkarteek parte hartuko dute, alkatearekin eta ordezkariarekin batera. Sarrerak bihar, hilak 25, jarriko dira salgai Luis Mariano kaleko turismo bulegoan eta udalaren webgunean.
Urriaren 2an ‘80 grados norte: donde el tiempo se congela’ dokumentala emango dute Irungo Emakumeen Etxean. Zahartze aktiboari buruzkoa da. Hain justu, prentsaurrekoan zera aldarrikatu du Angel Esteberdel Betiko Ametsa Koruko ordezkariak: “Adinekoa izatea aktiboa izatearen baliokidea da. Horregatik, aste horretan parte hartzeaz gain, Irungo adinekoak gonbidatu nahiko nituzte urte guztian zehar ekintzak egitera eta etxetik irtetera”.
Urriaren 3an eta 4an, ekintza desberdinak egingo dituzte, adibidez, arte tailerra eta dantzaldia Zabaltzako kioskoan. Urriaren 5ean, berriz, bizikletan ibiltzen ikasteko ikastaroak emango ditu Irungo Bide Hezkuntzak. “Egin izan ditugu halakoak eta oso eskertuta amaitu dugu, adinekoek erakutsitako jarrera zoragarria da”, esan du Txema Ortu kideak.
Urriaren 6, 7 eta 8an beste hainbeste, adibidez, ‘Tipi tapa’ martxa, txokolatada eta hainbat hitzaldi. Esaterako, azken egunean, urriaren 8an adineko emakumeen irudiaren inguruan hausnartuko dute, nola ikusarazi eta zein irudi eraiki den aztertuz. 18:30ean izango da, Irungo Emakumeen Etxean.
Aipaturikoak ekintza batzuk besterik ez dira, Irungo Udalaren webgunean dago egitarau osoa.
