Mentxu Gal beka, artistentzako beka berria
Gipuzkoako Foru Aldundiak eta Irungo Udalak aurkeztu dute. 25.000 euroko beka da eta urtebeteko epean hautatuak genero berdintasunarekin eta sorkuntza askearekin lotutako obra ondu beharko du.
Mentxu Gal Irunen jaio zen 1919an eta XX. mendeko margolari esanguratsua izan zen. Koloreen erabilerarengatik eta paisaiak islatzeko zuen moduagatik nabarmendu zen. 1959an historia egin zuen Espainiako Pintura Saria jaso zuenean, lehen emakumea izan baitzen hori egiten. Gerora, sari gehiago ere jaso zituen, adibidez, 2006an Irungo Udalaren Urrezko Domina.
Galen figura da, hain justu, Gipuzkoako Foru Aldundiak eta Irungo Udalak beka berriarekin jaso eta zaindu nahi dutena: Pintorearen sorkuntzarako askatasuna, berezkotasuna, independentzia eta berdintasunarekiko konpromisoa. Aldundiak Irungo Udalarekin batera aurkeztu du. 25.000 euroko beka da, eta urtebeteko epean sorkuntzarako askatasunean, baieztapen pertsonalean eta genero berdintasunean inspiratutako obra aurkeztu beharko du hautatuak.
“Mentxu Gal Irungo izena kanpora eraman zuen, eta emakumeentzako bidea ireki zuen artearen eta kulturarean munduan bidea ireki zien emakume askori”, azpimarratu du Cristina Laborda alkateak. “Bere legatuak bizirik jarraitzea nahi dugu, bidea ireki dezala gaur egun artearen munduan beren ahotsa bilatzen ari diren horiei”, esan du Kultura ahaldun Goizane Álvarezek.
Proiektuak aurkezteko epea gaur, hilak 23, ireki da eta Gipuzkoako Aldizkari Ofizialean argitaratu eta hogei lanegunera amaitzen da. Lanak online edo aurrez aurre aurkeztu daitezke, Aldundiaren sede elektronikoan edo fisikoan, Donostian. Proiektuak originala izan behar du eta gehienez ere, irailaren 1ean hasitakoa. Aukeratutako proiektua datorren urteko abenduaren 1an amaitu beharko da.
