Lurraldebusen zerbitzu berriak urriaren 1etik aurrera
Irun eta Hondarribiko herrien egungo beharretara egokitutako zerbitzu zabalagoa, koordinatuagoa eta egokitua eskainiko duela Lurraldebusek azaldu du Azahara Dominguez Mugikortasuneko, Turismo eta Lurralde Antolaketako diputatuak.
Agerraldiaren irudi bat.Gipuzkoako Foru Aldundia Aldaketekin dator Lurraldebusen zerbitzua Oarsoaldera eta Irun eta Hondarribira. Urriaren 1etik aurrera ezarriko ditu Mugikortasuneko, Turismoko eta Lurralde Antolaketako departamenduak; xehetasun guztiak eman ditu Azahara Dominguez diputatuak atzo egindako agerraldian. Aldaketen zioa azaldu du Dominguezek, “eskualdeen egungo beharretara egokitutako zerbitzu zabalagoa, koordinatuagoa eta egokitua” eskaintzea.
Datuak eman ditu diputatuak: 10,7 milioi bidaia egin ziren iaz Oarsoaldeko lau udalerrietan, Irun eta Hondarribian, “aldaketak bizilagunen benetako beharrei erantzuteko pentsatutako plangintza batekin egin dira”. Hala ere, urriaren 1etik aurrera, funtzionamendua aztertzen joango direla gaineratu du Dominguezek, “eta sor daitezkeen beharrei erantzuten”.
Oarsoaldean, Irun eta Hondarribian Lurraldebusek emango duen zerbitzua 29 lineatan banatuta egongo da eta 58 autobusek egingo dute zerbitzua, “gaur egun baino zazpi gehiagok. Hori horrela, sarearen ordutegi estaldura zabaldu ahalko da, goizean lehenagotik eta gauean beranduagora arte, ostiraletik igandera 24 orduko zerbitzua eskainiz, eta ordutegiak egokituz Donostiako autobus geltokitik iritsi eta irteten diren distantzia luzeko zerbitzuekin loturak egin ahal izateko”.
Donostiako ospitale gunea eta Miramon parke teknologikoarekiko konexioak “nabarmen handituko” direla ere adierazi du Dominguezek. Hobekuntzen artean beste bat, N-1 errepideko ardatzean (Errenteria-Orereta, Pasai Antxo, Donostia) 8 minutuero autobus bat izango da.
Adimen artifiziala
Zerbitzua hobetzeko adimen artifiziala baliatu dutela ere azaldu du diputatuak. Hala, flotara gehituko diren autobus berriek smart ramp sistema izango dute mugikortasun arazoak dituzten erabiltzaileek erabiltzen dituzten arrapalen mantentze lan prediktiboa egiteko aukera emango duena, baita smart clima sistema ere, ibilgailuen barruko tenperaturak une horretan kanpoan dagoen eguraldiaren arabera egokitzeko.
Emakida berriari buruzko informazio guztia gaurko (hilaren 22a) 14:00etatik aurrea kontsulta daiteke hemen klik eginda.
Lurraldebusen zerbitzu aldaketak
Hondarribia
• Urte osoan zehar aireportuaren eta Donostiako autobus geltokiaren arteko zuzeneko konexioa izango du (BI01), maletak eramateko lekua duten ibilgailuekin. Zerbitzu hori E30 linearen bidez eskaintzen da 2024az geroztik udako hilabeteetan, baina urriaren 1etik aurrera urte osoan mantenduko da, aireportuko hegaldien ordutegietara egokitutako ordutegiekin. Autobus honetan, gainera, banku-txartela bidez ordaindu daiteke.
• Donostiako ospitale-gunearekiko eta Miramongo parke teknologikoarekiko konexioa hobetuko da BI06 linearen bidez (2025eko ekainetik E29 izendapenarekin ari da lanean), langileen lan-ordutegira egokitutako ordutegiekin. Gainera, asteburuetan zerbitzua zabaltzeko lanean ari gara.
• BI04 lineak Bidasoa Ospitaleko, Araso industrialdeko eta Txingudi Merkataritza Guneko langileen ordutegietara egokitutako ordutegiak eskainiko ditu.
• Irunekin gaueko zerbitzua bermatuko da urteko egun guztietan.
Irun
• Donostiako ospitale-gunearekiko eta Miramongo parke teknologikoarekiko konexioa hobetuko da BI06 linearen bidez (2025eko ekainetik E29 izendapenarekin ari da lanean), langileen lan-ordutegira egokitutako ordutegiekin. Gainera, asteburuetan zerbitzua zabaltzeko lanean ari gara.
• Hondarribiarekin 15 minutuko maiztasuna bermatuko da puntako orduetan (BI05).
• Hondarribiarekin gaueko zerbitzua bermatuko da urteko egun guztietan, eta gaueko konexio gehiago egongo dira Donostiarekin.
