"Antza denez, denak balio du emakumeek Alardean parte hartu ez dezaten"
Guztion Alardeak aurtengo Alardearen balorazioa plazaratu du, hausnarketa moduan.
Errespetuaz eta bizikidetzaz mintzo dira Guztion Alardeko kideak. Zaila da ulertzea bizikidetzaz hitz egitea, eta aldi berean, irailaren 8an Gernikako Arbolatik desagertzea, edo hilaren 7ko aurreskuan Jaizkibeleko hiru kide egoteagatik bertan egoteari uko egitea”, esan du Guztion Alardeak. 2026ko Alardearen balorazioa egin du taldeak, HAOSEri eta haren inguruko taldeei kritika zuzena eginez, besteak beste.
Guztion Alardeak dio azken aldian HAOSEk eta haren inguruko taldeek (Hondarribiko Emakumeak eta Gure Alardea) bizikidetza, aniztasuna, errespetua eta demokrazia bezalako hitzak erabili dituztela, baina haien ekintzek ez dutela hitz multzo hori irudikatzen. Jakina da azken urteetan, Alarde tradizionalak Gernikako Arbolan egoteari uko egin diola, Jaizkibelekin elkartzea errefusatuz. Horregatik, Guztion Alardeak azaldu du ez dutela ulertzen nola bizikidetzaz hitz egin daitekeen horrelako erabakiak hartuz.
Demokrazia. “Ezin dugu ahaztu Alardea pribatizatu zela, eta gaur egun HAOSEk duela haren jabetza. Horrek esan nahi du hondarribiar guztiona izan beharko lukeen ondare baten kudeaketa hondarribiarrok bozkatu ez dugun herritar talde baten esku dagoela”, azaldu du Guztion Alardeak. Diskurtsoez ari dira, erabiltzen diren hitzez, eta horren harira Guztion Alardetik argi dute HAOSEko agintariek ederki dakitela haien hitzak neurtzen. “Ez dute inoiz zuzenean esaten haien helburua emakumeei Alardean parte hartzea eragoztea dela. Horren ordez eufemismoak erabiltzen dituzte; eta alardea ulertzeko modu batez edo sentimendu batez mintzo dira”.
Galderak planteatuz
Guztion Alardearen ustez, haiei ere “gogorregia iruditzen zaie zuzenean esatena emakumeek, emakume izateagatik, ezin dutela gizonek egiten dutena egin”. Taldeak egindako hausnarketak galdera argi bat plazaratu die: “Zer norabide hartzen ari gara?”. Ehunka pertsonek utzi dute Alardea azken urteetan, Guztion Alardearen ustez, hori “gatazkaren kudeaketak eragin duelako”.
Demokrazia ulertzeko, Guztion Alardeak dio HAOSEk hondarribitar guztien iritzi eta sentsibilitateak hartu beharko lituzkeela kontuan. “Horren ordez, herriak modu legitimoan aukeratutako instituzioen kontra egin eta, zenbaitetan, haien pare kokatu izan da. Besteak beste, hori agerian gelditu da herritar guztion sinboloa den banderaren kopiarekin”.
“Antza denez, denak balio du emakumeek Alardean parte hartu ez dezaten”.
