Performancea egingo dute sexu esplotazioa eta pertsonen salerosketa salatzeko
Sexu esplotazioaren eta pertsonen salerosketaren aurkako egunean, irailak 23an, Txingudiko Elkarte Feministak performance egingo du 19:00etan. Emakumeen Etxeak prostituzioaren inguruko hitzaldia egingo du biharamunean.
Sexu esplotazioaren eta pertsonen salerosketaren aurkako eguna da irailak 23. Horiek horrela, beste urte batez, Txingudiko Elkarte Feminista kalera irtengo da eta performancea egingo du hiriko puntu ezberdinetan, Inor ez dago salgai lelopean, sexu esplotazioa ikusteko eta gaitzesteko.
19:00etan abiatuko da, Txanaleta plazatik, eta mugitzen joango da: 19:30ean Topoaren atean egingo dute; 19:50etan Ensanche plazan; eta 20:15etan Argentinako Errepublikako plazan amaituko dute. Jendea bertaratzera animatu dute: “Ikusgarri egin eta hausnartu askotan ezkutuan geratzen den errealitatearen inguruan. Pertsonak ez dira merkantzia”. Performanceak Gipuzkoako Foru Aldundiaren babesa dauka.
Prostituzioa aztergai
Egun beraren testuinguruan, Irungo Udaleko Berdintasun Sailak doako hitzaldia antolatu du biharamunerako, hilak 24, Emakumeen Etxean 18:30ean. Prostituzioaren inguruan jardungo da gizarte langile eta Arrats erakundeko Aukera programako Sònia Vegak. Aukera programak hogei urte daramatza prostituzioan aritzen diren pertsonekin harremantzen eta gertutik ezagutzen du egoera.
Feminismoaren barne eztabaidetako bat da prostituzioarena, batzuk abolitzearen alde eta beste batzuk babestearen alde baitaude. Eztabaida azaldu eta hura hobeto ulertzeko hiztegia eta kontzeptuak azalduko ditu Vegak.
