Hondarribiko hotelen %95a bete da udan, Irunen, %98a
Bidasoa Bizirik plataformaren bidez eman dituzte Hondarribiko eta Irungo udako turismo datuak. Jende asko bertaratu da eskualdera, eta horrek abantaiak eta desabantailak sortzen ditu.
Bidasoa Bizirik plataformak udako Irungo eta Hondarribiko turismoaren datuak plazaratu ditu, “balorazio positiboa” mahaigaineratuz. Estitxu Urtizberea Hondarribiko zinegotziak eta Nuria Alzaga Irungo udaleko politikariek eman dituzte datuak, agur, Arma Plazan. Orotara, ia ezinezkoa da jakitea zenbat bisitari iritsi diren Bidasoara udan, baina hainbat datu begiratuz, ikusi daiteke, adibidez, turismo bulegoen erabilera edota hotelen okupazio maila oso altua izan dela.
Argi dago Irunen eta Hondarribiaren turismo ereduak ez direla berdinak. Irunen, hotelen okupazio maila oso altua izan da, %98koa zehazki, baina ondoren, bertan lo egiten duten turista askok beste herri eta hiri batzuk aukeratzen dituzte eguna pasatzeko, eta beraz, kontsumitzeko. “Saiatu behar gara Irun ere helmuga turistiko bat bilakatzen, erakargarriak izaten, ez soilik logela moduan funtzionatzeko”, azaldu du Alzagak. Horri gehituz, esan du Irungo eskaintza kultural eta turistikoa bisitatzen duten pertsona askok, berriro ere bertara itzultzeko asmoa erakusten dutela. Oiasso museoa edota Irugurutzetako minak dira Irungo erakargarri turistiko handienak, eta aurten, udan, milaka bisitari izan dituzte. Oiasso museoak 8.000 bisitari inguru izan ditu eta minetara doan trenean 700 pertsona inguru igo dira.
Hondarribia aldiz, beste mundu bat da. Mundu osoko pertsonak hurbiltzen dira bertara, asko eta asko sare sozialek bultzatuta, bertan Euskal kostan galdu ezin duzun herria irakurri edo ikusi dutelarik. Hotelen okupazioa %95ekoa da, eta Urtizbereak esan duenez, Hondarribiko hotelen eredua oso ezberdina da Irunen dagoenarekin alderatuta. “Hondarribian ditugun hotelak jabe txikikoak dira, ez dugu kate handiko hotelik. Horrek eragiten du urte osoan zehar irautea zaila izatea, eta askok, neguan ixteko erabakia hartzen dute”, esan du Turismo zinegotziak. Abuztua izaten da turismo gehieneko hilabetea, eta hori datuetan ikusi daiteke. Hondarribian, uztailan, hotelen okupazioa %89koa izan zen, eta abuztuan %95ekoa.
Urtizberea herritarrez eta turismoarekin duten harremanaz mintzatu da. “Kontzienteak gara bai Portuan eta baita ere Kale Nagusian bizilagunek turismo jario handia jasan behar dutela. Saturazio sentimendua badago, eta lanean jarraitu behar dugu hori orekatzearen aldera, turismo arduratsu horren bila”. Gaur egun, Aste Santutik aurrera ikusi daitezke bisitariak Hondarribiko kaleetan zehar, ia azaroa arte. Horrek, herritarren kexak hedatu ditu azken urteetan, eta hainbat plataforma mobilizatu dira horren aurka, hala nola, Bidasoko Gazte Langileen Asanblada, eta duela bi urte egindako Turistak gara gure herrian kanpaina.
Agenda eta trafikoa
Turismo bulegoek ere bisita gehiago jaso dituzte aurten iaz baino. Bi herrietakoak gehituz, 17.000 pertsona baino gehiago pasa dira bertatik, eta haietako hein handi bat, %40a inguru, atzerritarrak izan dira. Herriak ezagutzeko edota bertako aktualitate kulturala zein den jakiteko leku aproposenak dira bulegoak. “Gure paisai naturalaz gain, eskaintza kultural handia dugu, eta badakigu horrek ere bisitariak erakartzen dituela. Dies Oiassonis, Bidasound, Euskal Jira… sortzen ari garen agenda anitza da, eta horrek jendea erakartzen du”, esan du Alzagak.Â
Turismoak erakartzen duen arazo handienetakoa eskualdean sortzen den trafikoa izaten da. Irunen nabariak dira trafiko arazoak, muga ondoan egonda, jende askok bertatik pasa behar duelako Europara joateko edo Espainia aldera bidaiatzeko. Baina Hondarribian ere, inbutu bat izanez, herriko sarrera eta irteera ia bakarrarekin, ezinezkoa egiten da egun askotan bertara autoarekin gerturatzea. Urtizbereak adierazi du, herriko Udaltzaingoarekin elkarlanean pixkanaka hobetzen doazela afera horretan. Aurten, adibidez, jada Amuteko biribilgunean, hondartzako aparkalekuaren edukieraren berri eman da, horrela, bisitariei aukera emateko zer nolako kapazitatea dagoen jakiteko eta beharko balitz atzera itzultzeko.
