Hiri barneko autobusak hobekuntzak behar ditu EAJren ustez
Jeltzaleek batzorde baten eraketa eskatu dute, autobus zerbitzuaren galerak identifikatzeko eta hobekuntzak aztertzeko. Geltoki gehiago eskatu dituzte, eta baita ere zerbitzuari buruzko informazio hedapen handiagoa.
Behin betiko hiri barneko autobusa martxan dago jada aste hontatik aurrera. Baina EAJk uste du asko dagoela hobetzeko. Hiri autobusa lehen aldiz martxan jartzerakoan, jeltzaleak kexu izan ziren, ibilbideari eta geltokiei buruz. Oraingoan, adierazi dute, besteak beste geltokiak ez daudela ongi adieraziak, eta geltoki berriak jartzeko azterketa beharrezkoa dela. Haien ustez, horrek zerbitzua hobetuko luke, eta herritarrek aukera gehiago izango zituzten mugitzerako orduan.
Zerbitzuaren erabilera ez da bakarrik handituko EAJren ustez, eta hor udalak eskua sartzea eskatu dute. Aldaketa berriak planteatzeko eta orain arteko ibilbidea aztertzeko, batzorde bat eraikitzea eskatu dute. “Zerbitzu berria da eta logikoa da egokitzapen-aldi bat behar izatea, baina, hain zuzen ere, horregatik aztertu behar dugu zer ari den ondo funtzionatzen eta zer egin dezakegun jende gehiagok erabil dezan. Ezin gara autobusa martxan jarri eta erabilera berez handituko denaren zain geratu: aktiboki lan egin behar dugu erabilera handitzeko”, gehitu dute jeltzaleek.
Geltoki berriak aipatzean, Egiluze eta Ama Guadalupekoa ikastetxeen ondoan behar direla esan dute, adibidez. Baina zerbitzua hobetzeko, EAJk uste du herritarrak zerbitzuaz jakin behar dutela, eta martxan hasi zenean egindako eskuorri banaketaz gain, komunikazioa hobe landu behar dela. Planteamendu horrek udal gobernuaren aldetik autokritika handiagoa ere eskatzen du, jeltzaleen ustez. “Datuen berri komunikabideen bidez izan dugu, aurrez informazio hori eskatu genuen arren. Uste dugu udal gobernuak lehen hilabete hauek zerbitzua modu kritikoan ebaluatzeko eta hobetzeko neurri zehatzak mahai gainean jartzeko baliatu beharko lituzkeela, emaitzen balorazio autokonplazientea egitea baino”, adierazi du talde jeltzaleak.
Europako Mugikortasun Astean gaudela aprobetxatuz, EAJk adierazi du udalaren helburua ezin dela soilik autobusa martxan jartzea izan, baizik eta xedea herritarrek zerbitzua erabiltzea izan behar dela.
