Danimarkan izan da Hondarribiko Udala, AuzoEKIN programa aurkezten
Aarhusen egindako nazioarteko kongresuan izan dira Josu Peña zinegotzia eta Olatz Gorriño teknikaria. Bakardadeari eta harreman sozialei buruzko kongresua izan da Danimarkakoa.
AuzoEKIN programak denbora darama martxan Hondarribian, eta 2026a izan da herrian finkatu den urtea. Bakardade ez hautatua hainbat aldetatik borrokatzeko egitasmoa auzoz auzo banatzen da, eta hainbat erabiltzaile ditu gaur egun. Aste honetan, Josu Peña Gizarte Kohesioko zinegotzia eta Olatz Gorriño teknikaria Aarhusen (Danimarka) izan dira, bertan garatzen den bakardadeari eta harreman sozialei buruzko nazioarteko kongresuan, AuzoEKIN programa aurkezten.
Bakardadeari eta gizarte isolamenduari aurre egiteko milaka modu daude, eta herri eta herrialde bakoitzak bere formulak ditu. Danimarkan egindako kongresuan hainbat adibide aurkeztu dira, horrela haien artean esperientziak partekatuz eta ekiteko modu berriak ikasiz. Udalak adierazi du haien parte hartzea Interreg Europe KORALE proiektuaren baitan izan dela. “Proiektu honen xedea bakardadeari eta gizarte-isolamenduari ikuspegi sistemiko batetik heltzea da, baita Europako eskualde eta erakundeen artean ezagutza eta esperientziak trukatzea ere”, adierazi du Hondarribiko Udalak.
Bakardade ez hautatuari aurre egiteko, lehenik eta behin herriko azterketa bat egin zen, eta bertan ikusi zen ikuspegi komunitariotik heldu beharreko arazo bat zela. Hori izan zen AuzoEKIN sortzeko lehen pausoa, eta hori bera azaldu du kongresuan Gorriño teknikariak. Proiektuaren nondik norakoak azaldu ditu Gorriñok, azpimarratuz auzoek eta bertako bizilagunek duten garrantzia. “AuzoEKINen esku-hartzea hiru mailatan garatzen da. Batetik, pertsona bakoitzaren beharrei erantzuteko banakako esku-hartzeak daude; bestetik, komunitatea aktibatzeko ekimenak; eta, azkenik, auzoei eta herri osoari zuzendutako jarduerak. Horretarako, talde eragilea, talde estrategikoa eta eragileen mahaia baliatzen ditu programak, eragile eta ikuspegi desberdinak elkarlanean jartzeko”.
Peñak nabarmendu du horrelako esperientziak trukatzearen garrantzia handia dela, ulertuz lurralde bakoitzak bere baliabideak dituela, eta horiekin haien ekiteko formak sortzen dituztela. “Guretzat interesgarria da beste toki batzuetan zer egiten ari diren ezagutzea, eta, aldi berean, Hondarribian garatzen ari garen AuzoEKIN Europako beste erakunde batzuekin partekatzea”, esan du Peñak. AuzoEKIN martxan dagoen bitartean, zinegotziak argi du asko dutela ikasteko, eta horrelako esperientziek horretarako balio dutela.
Auzoz auzo
Oraingoz, AuzoEKIN proiektua herriko lau eremuetan garatzen da: Amuten, Arkollan, Mendelun eta Alde Zaharrean.
- Amuten: Kafe tertulia hilaren lehenengo asteartetan, 17:00etan, Amuteko auzo elkartean.
- Arkollan: Kafe tertulia hilaren bigarren astelehenetan, 16:30ean, Ballestanean.
- Mendelun: Kafe tertulia bi astetik behin, astearteetan, 11:00etan, Eguzki elkartean.
- Alde Zaharran: Adimena pizten, hileko 3. asteazkenetan, 16;30ean, Kultur Etxeko 103 gelan.
Baina proiektua ez da ezer Auzozainik gabe. Horretarako, boluntarioak behar ditu udalak, egitasmoetan parte hartzeko, eta beste herritarrei haien laguntza eskaintzeko. Auzozain izateko aukera eta informazio guztia, udaletxeko web atarian dago. Hara joateko, egin klik hemen.
