San Nikolas atea, Erdi Aroko zatitxo bat berreskuratuz
Erdi Aroko harresiko ate garrantzitsua zen hura, eta orain, harresi handien atzean ezkuturik mantentzen da. Zaharberritze lanak egingo ditu udalak bertan.
San Nikolas atea Hondarribiko ikur handienetako bat da. Erdi Aroko harresi zaharraren gaur egungo adibide nagusienetarikoa da, eta beraz, herriak duen ondare historiko eta arkitektoniko handienetarikoa. Udala bada horren kontziente, eta horregatik, atearen zaharberritze lanak hasiko dituztela adierazi dute. “Esku-hartzearen bidez, haren jatorrizko harlangaitzezko eta harrizko egiturak berreskuratuko dira, eta eraikinak mendeetan zehar izan duen bilakaera agerian utzi”, adierazi du udalak.
Igor Enparan alkatea mintzatu da zaharberritze prozesu honi buruz: “San Nikolas atea ez da soilik harrizko egitura bat. Erdi Aroko Hondarribiaren lekuko zuzena da, eta hiriko defentsa-sistemaren parte izan zen. Proiektua prestatzen ari ginela konturatu gara egun duen egoera eta itxura ez datozela bat jatorrizko atearekin. Mendeetan zehar izandako eraldaketek eta egindako esku-hartzeek nabarmen aldatu dute haren itxura, eta, aldi berean, ez du jaso bere garrantzi historikoari dagokion zainketa”. Horregatik, orain ahaztuta edo ezkutuan geratu den ondarea “berreskuratu eta balioan jarri nahi du” udalak.
Atearen jatorrizko egitura mantentzea da zaharberritze lanak duen irizpide nagusiena. Prozesua bitartean, eraikinaren irakurketa historikoa oztopatzen dituzten elementuak kendu nahi dituzte, horrela, atearen itxura originalera gehien hurbiltzeko xedearekin. Eremu horrek hainbat aldaketa izan ditu mendeetan zehar, eta bertaratutakoei hori bera azaltzeko asmoa dute. “Ondarea babestea Udalaren lehentasunetako bat da. Hondarribiak ondare historiko eta arkitektoniko oso aberatsa dauka, eta hori zaintzea gure hiriaren nortasuna indartzea ere bada”, adierazi du Enparanek.
Hiru hilabeteko obra aurreikusten dute, eta 156.525 euroko aurrekontua. Kostu horretatik 90.000 euro Eusko Jaurlaritzako Ondare Sailetik iritsiko dira.
Harresiko harriak
Atea soilik ez, alboko etxean, beheko aldean, Erdi Aroko harresiaren zatiak badaude, eta hori bera agerian uzteko lanak egingo dira. Horrela, harresi zaharra ikusgai egongo da, beti ere, bertako etxebizitzei kalterik egin gabe. “Gaur jasotzen duguna aurreko belaunaldiek utzi diguten ondarea da, eta gure ardura da egoera onean hurrengoei transmititzea. San Nikolas atearekin egiten ari garen lana norabide horretan doa”, esan du Ortzi Alonso Kultur zinegotziak.
