Abian da '30ak 20 berriak dira' kanpainaren edizio berria
Deskontu kodeak eskatzeko epea irekita dago datorren irailaren 29ra arte. Jarraian, urriaren 26tik abenduaren 4ra arte erabili ahalko dira.
Azken ediziotik apenas hilabete batzuetara, abian da, seigarren urtez, deskontu kodeen salmenta Irun.market plataforman produktuak online erosi ahal izateko. Irailaren 29ra arte eskatu ahal izango dira kodeak, udalaren webgunetik, eta datorren urriaren 26tik abenduren 4ra arte egongo da zabalik trukea egiteko aukera.
Aurreko edizioan bezala, 35 urte bitartekoek hamar kode jasoko dituzte pertsonako, ohiko bosten ordez, gazteen artean tokiko merkataritzan erostea sustatzeko. Ordea, oraingo honetan, txeke berri bat izango da: Denda fisikoan erosteko txekea. Saltokiek baliatuko dute bezeroek dendan bertan eros dezaten.
Txekea eskuratzean, erabiltzaileak bidalketa eskatzerakoan ‘Dendan jasotzea’ aukeratu beharko du, eta erosketa-egiaztagiria (eskaera-zenbakia) aurkeztu saltokian, transakzioa osatzeko.
Txeke bakoitzak 30 euro balio ditu eta 20ra murriztuko da deskontu kodea aplikatuta. Erosketak txekearen balioa gainditzen badu, erabiltzaileak diferentzia ordaindu beharko du, baina zenbatekora iristen ez bada, saltokiak ez du aldea itzuli beharko. Txekeak erabiltzeko epea abenduaren 11n amaituko da.
Aurkeztutako datuen arabera, azken kanpainan 673 parte hartzaile eta 1.184 bonu trukatu ziren. Nuria Alzaga Irungo lehen alkateorde eta Hiria Bultzada eta Ekonomiaren Sustapeneko ordezkariak begi onez baloratu du, esanez “eragin positiboa” izan zuela.
