'30ak 20 berriak dira' kanpainaren bosgarren edizioa, bueltan
Irun.market plataformarako kanpainan 673 irundarrek parte hartu dute, eta kodeak maiatzaren 11tik ekainaren 22ra bitartean trukatuko dituzte.
Kontsumo kanpainak anitzak dira Irunen, eta Irun.market plataformak 30ak 20 berriak dira kanpainaren bosgarren edizioa martxan jarriko du. Bosgarren edizioan 673 irundarrek parte hartu dute, eta maiatzaren hasieran kodeak posta elektronikoz bidaliko dizkiete. Maiatzaren 11tik ekainaren 22ra bitarte, bidalitako kodeak trukatzeko aukera izango dute. Aurtengo berritasun gisa, 35 urtetik beherako gazteek ohiko bost kodeen ordez, hamar kode jasoko dituzte. 35 urtetik gorakoek, berriz, pertsona bakoitzeko bost kode izango dituzte.
Bosgarren edizioak parte hartzaileen gorakada izan du, udazkeneko kanpainarekin alderatuta, %58ko hazkundea izan du parte-hartzaileen kopuruak. “Kopuru horiek argi uzten dute herritarren artean berrikuntzek izandako eragin positiboa”. Nuria Alzaga alkateorde eta Hiri Bultzada eta Ekonomiaren Sustapeneko ordezkariak tokiko merkataritzari laguntzeko bultzada ematen jarraitzen dutela argi utzi du. “Norabide berean urratsak ematen jarraitu behar dugu, tokiko merkataritzarekiko konpromiso horri eutsiz, baita egunerokoan ere”.
Txeke bakoitzak 30 euroko balioa izango du, eta beherapena aplikatu ostean 20 euroko balioa izango du. Irun.market plataformak aukera emango die tokiko merkataritzan erosteaz ere, erosketak ere online egitea eta hiri barruan bidalketak kudeatzea, Badoaren laguntzarekin. Txeke bat eskuratzean, erabiltzaileak Dendan jasotzea aukeratu beharko du bidalketa-metodo gisa, eta establezimenduan erosketa-egiaztagiria aurkeztu beharko du transakzioa osatu ahal izateko. Udalak gogorarazi die erosketak txekearen balioa gainditzen badu, erabiltzaileak diferentzia ordaindu beharko duela; eta alderantziz, zenbatekoa iristen ez bada, saltokiak ez du diferentzia itzuliko.
