Jai arrakastatsuak, baina intzidentziekin
Balorazio positiboa egin du udalak, ekitaldien kopurua eta aniztasuna nabarmenduz. Hala ere, hainbat inzidentzia izan dira, haien artean hiru indarkeria matxista kasu.
Hondarribiko Udalak herriko jaietako balorazioa plazaratu du, egindako ekitaldien kopuruan eta aniztasunean nabarmenduz. Eguraldi onak lagundutako jaiak izan direla adierazi du Ortzi Alonso Kultura zinegotziak, eta horrenbestez, plangintza jarraitzeko aukera izan dutela, aldaketarik gabe. “Pozik gaude herritarrek erakutsi duten parte hartzearekin eta Hondarribiko kaleetan bizi izan dugun jai giroarekin”, esan du Alonsok.
100 ekitalditik gora egin dira jaietan, bai udalaren baina baita ere herri eragileen eskutik. “Azken finean, jaiak herritarrekin eta herritarrentzat egiten dira, eta aurten ere argi ikusi dugu hondarribiarrek eta bisitariek jaiak bizitzeko eta gozatzeko gogoa zutela”, adierazi du zinegotziak. 34 elkarte eta eragilek bultzatu dituzte ekintzak, eta horregatik, Alonsok, udalaren izenean, eskerrak eman nahi izan dizkie.
Balantze positiboa egin du beraz udalak, baina balorazioaren barnean albiste txarrak ere iragarri dituzte. Hiru indarkeria matxista kasuren berri izan du udalak, eta horren aurrean, Hondarribiko Udalak bere gaitzespenik irmoena erakutsi du. “Hondarribiko Udaletik irmoki gaitzesten ditugu indarkeria matxistaren adierazpen guztiak, eta emakume guztiek bizitzako esparru guztietan askatasunez, segurtasunez eta beldurrik gabe bizitzeko duten eskubidea defendatzen dugu. Jai-giroak ezin du inola ere justifikatu emakumeen aurkako indarkeriarik, jazarpenik edo bestelako jokabide matxistarik”.
Irailak 10eko gertakariak
Bestalde, irailak 10eko gertakariez mintzatu da udala. Elektrotxarangaren kontzertua bitartean, bi gaztek pankarta bat erakutsi zuten Itsas Etxeko balkoian, bengala bat eskuan zutela. Jaisterakoan, identifikatzeko asmoarekin, poliziak, indarkeria baliatuz, lurrera bota zituen, eta inguruko jendea kexu zenean, gogor jo zuten herritarren aurka, paretaren aurka bultzatuz. Udalak adierazi du udaltzaingoa sute abisu batengatik bertaratu zela hara, baina lekukoek diotenez, udaltzaingoa bertan zegoen jada bengala piztu baino lehen. Hondarribiko Udalak ez du ezer adierazi poliziak erabilitako indarkeriari buruz, eta esan du gertatutakoa Ertzaintzaren ikerketapean dagoela, GEDAR hedabideak adierazi arren atxilotuak udaltzaingoaren menpe izan zirela gau hartan.
