Hiri barneko behin behineko autobusak bihar egingo du lehenengo bidaia
Oraina arte ordezko ibilgailu batekin egin du autobusak zerbitzua, baina bihar jada behin behinekoa jarriko da martxan. Otsailetik 17.686 bidai egin dira zerbitzuan.
Otsailean jarri zen martxan Hondarribiko hiri barneko autobusa. Urte askotan eskaturiko neurria izan da herritarren eta hainbat alderdi politikoren aldetik, eta azkenik, aurten hasi da martxan. Baina lehen hilabeteetan autobus zuri bat ikusi da kaleetan, identitaterik gabekoa. Orain baina, diseinu berri batekin hasiko da zirkulatzen. Udalak, autobus berriaren diseinua aukeratzeko bozketa bat egin zuen herritarren artean. Diseinua ez ezik, autobusa ere berria izango da.
Elektrikoa da %100ean, eta egun osorako autonomia du. “Mugikortasun-eredua eraldatzeko urrats garrantzitsua da, garraio publiko modernoa, jasangarria eta inklusiboa herritarren eskura jarriz. Autobusa %100 elektrikoa da eta, beraz, ez du emisiorik sortzen. Horrek tokiko kutsadura murrizten laguntzen du, eta, aldi berean, karbono-aztarna txikiagoa duen mugikortasun-eredu baten alde egiten dugu”, azaldu du Estitxu Urtizberea zinegotziak.
Martxan izan den lehen sei hilabeteetan ia 20.000 bidai erregistratu ditu autobusak, 17.686 zehazki. Maiatza izan zen erabilera handieneko hilabetea, 3.338 bidaiarekin. Azpimarratu dutenez, adineko pertsonak eta gazteak dira zerbitzua gehien erabiltzen dutenak. “Lehen sei hilabeteetako datuek erakusten dute zerbitzua pixkanaka txertatzen ari dela herritarren eguneroko mugikortasun-ohituretan”, nabarmendu du Igor Enparan alkateak. “Pozik gaude hiri-autobusak lehen hilabete hauetan izan duen erantzunarekin. Garraio publikoko zerbitzu berri bat martxan jartzeak egokitzapen-prozesu bat eskatzen du, baina datuek erakusten dute badagoela benetako eskaria eta gero eta herritar gehiagok erabiltzen dutela autobusa eguneroko joan-etorrietarako. Orain, erronka da erabilera hori sendotzea eta hazten jarraitzea, autobusa gero eta baliagarriagoa izan dadin herritarren eguneroko mugikortasunerako. Zerbitzua herritarren ohituretan pixkanaka txertatzen ari da”.
