Bosgarren postua Kontxan
Bosgarren postua lortu du Hondarribia Arraun Elkarteak Kontxako sailkapen orokorrean. Ligako azken bi estropadak dituzte aurrean.
Irutxuloko Hitzak ateratako argazkia. Denboraldiko azken txanpan dago Hondarribia Arraun Elkartea. Atzo, Kontxako Banderan lehiatu ziren, eta bi jardunaldien batura eginez, bosgarren postuarekin geratu ziren. Atzo, ohorezko txandan izan ziren, eta hori zen helburu nagusietako bat. Bertan, lehia ederra erakutsi zuten Donostiarraren aurka, baina azkenean etxekoak aurreratu ziren. Oriok irabazi zuen bandera, denboraldi osoan zehar bezala, nagusitasun handiarekin, eta emakumezkoetan Arraun Lagunak traineruak.
Lehen jardunaldian, Bermeok penalizazio bat jasan zuen arraun kolpeak izan zirela eta, eta horrenbestez Ama Guadalupekoa lehen txandan sartu zen. Atzo, Orioren, Donostiarraren eta Zierbenaren aurka lehiatu zen. Hasieratik jada Oriok nagusitasuna erakutsi zuen bigarren jardunaldian. Donostiarrak atzetik jarraitu zion, baina gutxinaka haien arteko tartea handitzen joan zen. Hondarribiak Donostiarrari segundo batzuk jan zizkion azken metroetan, baina azkenean lehen txandako hirugarrenak izan ziren Ama Guadalupekoa eskifaiako arraunlariak.
Denboraldi hasieran Mikel Orbañanos entrenatzaileak argi zuen aurten ligako sailkapeneko goiko aldean egon nahi zutela, eta gutxinaka lortu dute. Ohorezko txandan hainbatetan izan dira, eta bigarren postuak ere lortu dituzte. Oraindik bi estropada gelditzen dira, Bermeon eta Bilbon. Bosgarren postuan da Hodarribia sailkapenean, Getaria aurrean duelarik, 11 puntotara. Zaila izango du liga laugarren postuan amaitzea, baina Ioseba Amunarrizen mutilek dena emateko asmoa dute azken jardunaldietan.
Etxekoekin lehian
Harrobiaren garrantzia erakutsi Mikel Orbañanosek Kontxako aurtengo lehian. Hamahiru arraunlaritatik, zortzi harrobikoak izan dira: Ibai Camarero, Osertz Larretxea, Andoni Irazoki, Xabier Olaskoaga, Eneko Iridoy, Xabier Salaberria, Aimar Kanpandegi eta Mattin Colas. Horrez gain, patroia ere, etxekoa, beteranoena, traineruaren ikurra: Ioseba Amunarriz.
