San Tomas Egunean txosna jartzeko epea, zabalik
Urriaren 15era arte zabalik egongo da; nekazaritza elikagaiak saltzeko postuen kasuan, urriaren 30era arte luzatuko da.
Dagoeneko zabalik dago San Tomas Egunean Urdanibia plazan txosna jartzeko epea. Gaurtik, hilak 11, urriaren 15era arte deialdia zabalik egongo da kultura, kirol, jolas edo gizarte arloko erakunde zein elkarteentzat. Oinarriak eta eskabideak Udal webgunean ikusgai daude eta Herritarrentzako Arreta Zerbitzuaren (HAZ) bulegoetan entregatu beharko dituzte urriaren 15a baino lehen.
Onartutakoen behin behineko zerrenda urriaren 19an argitaratuko dute, eta hiru egun izango dituzte egokiak diren alegazioak aurkezteko udal webgunearen bitartez edota HAZ bulegoetara edo Ospitale Zaharreko Kultura zerbitzura hurbilduta. Zozketa publikoa urriaren 27an egingo dute Amaia KZn, 19:00etan. Eskatzaileek bertan egon beharko dute, eta lau multzotan banatuko dira: kultur elkarteak (A lotea), kirol elkarteak (B lotea), Gizarte elkarteak eta ikastetxeak (C lotea) eta elkarte sozialak eta gobernuz kanpoko erakundeak (D lotea). Gehienez sei postu esleituko dituzte.
Bestalde, nekazaritzako elikagaiak saltzeko postua lortzeko eskaera epea urriaren 30era arte luzatuko da. Deialdia baldintzak betetzen dituzten Irungo norbanako zein erakundeentzako irekita egongo da. Azokak hiru atal izango ditu. Alde batetik, barazkiak, frutak, loreak eta landareak izango dira; bestetik, produktu landuak; eta azkenik, baserriko animaliak. Orotara 22 lanpostu instalatuko dituzte, 09:30etik 20:00etara. Fruta, Barazki, Animali eta Ezti lehiaketan parte hartu nahi dutenek izena ematerakoan zehaztu beharko dute.
Txosnak esleitzeko prozesuan bezala, zozketa publikoa egingo dute azaroaren 13an Kultura eta Kirol arloko bilera gelan, 13:00etan.
