Ribera Azokak hamar urte beteko ditu
Datorren astean, hilaren 16tik 19ra, hiriaren memoria eta Bidasoa ibaiarekin lotura estua duten proposamen artistikoak aurkeztuko dituzte.
Urtero legez, Irunek hiriaren memoria eta Bidasoa ibaiaren garrantzia balioan jartzeko azoka antolatuko du. Aurtengoa, gainera, zifra borobila izango da: Ribera Azokak hamar urte beteko ditu. Datorren astean, hilaren 16tik 19ra, hainbat proposamen artistiko egingo dituzte Santiagoko bidegorrian eta CBAn. Adin guztietarako eskaintza zabala izango dute aurten: tailerrak, erakusketak, antzerkiak, mahai inguruak eta dantza emanaldia.
Ribera Azokak hiria beste ikuspuntu batzuetatik begiratzeko eta pentsamendua sortzeko modu bat eskaintzen du. “Hamar urte geroago, uste dut esan dezakegula hitzordu berezi eta ezagun bat eraiki dugula irundar erara, gogokoen dugun moduan egina”, adierazi du Nuria Alzaga Kultura ordezkariak.
Asteazkenetik ostiralera bitarte, Nagore Legarretak Ibaia ez da toki bat argazki tailerra eskainiko du CBAn. Bertan, ontzi birziklatuekin kamerak eraikitzeko aukera izango dute, Bidasoa ibaiarekiko harremanei argazkiak ateratzeko. Bestalde, ostiralean, toki berean, KEOA gunean hamargarren edizioari buruzko erakusketa aurkeztuko dute. 18:00etan izango da, eta ordubete beranduago, 19:00etan, Olvido Floresek formatu txikiko dantza ikuskizuna eskainiko du. 1936an du jatorri emanaldiak, zehazki, Lodosan. 1936ko gerra odoltsuaren oroitzapena duten pertsonen testigantzak taularatuko ditu.
Larunbatean, Bidasoa ibaian
Larunbata, hilak 19, egun handia izango da. Astean zehar CBA Ribera Azokaren egoitza nagusia izan bada ere, azken eguna Bidasoa ibaiaren inguruan antolatuko dute. 10.00etan emango diote hasiera egunari, Ixi Garciak dinamizatutako mahia inguru batekin. Mahaiaren bueltan, azokaren hamar urteak izango dituzte hizpide Helga Massetanik, Laura Diezek eta Maria Jose Noianek. Gainera, 2026 Ribera Beketan hautatutako proiektuen aurrerapen bat egingo dute han bertan.
Aurtengo bekak Francisco Marise eta Eider Rodriguezek egindako Kafe kikara batean eta Jon Abril eta Asier Gogortzak egindako Bidasoa Toponimia ttikia lanentzat izan dira. Beka honek Bidasoa ibaiaren eta memoria historikoaren ikerketak garatzea du helburu, bikoteka. Lanetan arte ederrak eta ikerketak uztartu behar dituzte parte hartzaileek.
Aurtengo azokari amaiera emateko 11:30ean Udane Juaristi artistak egindako murala estreinatuko dute. 13:30ean, Idoia Lizeagak astean zehar prestatuko instalazioak bisitatu ahako dira. Instalazio horiek mugaren eta kostaldeko mugaren kontrola hartzen zuten, eta funtzioa galduta dagoen arren, orain mugaz gaindiko errealitatea hartzen duen lekuko zuzena da.
