Txingudi Errubgi eskolak denboraldi berriari ekingo dio
Etzi, hilak 12, 10 eta 12 urtez azpiko taldeek saio berezia eta irekia izango dute Amuteko kirol gunean, 11:00etatik aurrera.
Bueltan da eskualdeko errugbia. Aste honetan, Txingudi Errugbi eskolak 2026-2027 denboraldia hasteko entrenamendu bereziak antolatuko ditu, errugbia sustatzeko eta kirolaren balioak beste urte batez sendotzeko helburuarekin. Gazte taldeen artean zelairatzen lehenak 14 urtez azpikoak izango dira. Gaur, hilak 10, 17:30etik 19:00etara denboraldiko lehen entrenamendua egingo dute, Plaiaundin. Gipuzkoako txapelketa irailaren amaieran hasiko dute, zazpiko errugbiko jardunaldi batekin.
Larunbatean, hilak 12, eskolako errugbi jokalari txikienen txanda izango da. Amuteko kirol gunean jardunaldi berezia izango dute 10 eta 12 urtez azpiko taldeek. Entrenamendu irekia izango da, 11:00etan hasita. Jardunaldi honetan errugbia lehen aldiz probatzeko aukera izango dute, eta klubak bertan parte hartzeko deia egin die errugbia ezagutu nahi duten haurrei.
Datorren ostiraletik aurrera, denboraldiko ohiko ordutegiaren hasiko dira. Txikitxoenen bi taldeek ostiralero entrenatuko dute Plaiaundin, 18:30etik 20:00etara. Partidei dagokienez, urriaren 4era arte itxaron beharko dute. Lehenengo partidak Hondarribiko hondartzan jokatuko dituzte, Gipuzkoako eskolen topaketaren barruan.
Bigarrenez, Emakume Errugbi Eguna
Denboraldia hastearekin batera, Txingudi Errugbi taldeak emakumezkoen kirola sustatzeko Emakume Errugbi Eguna antolatuko du hilaren 26an, larunbatarekin. Aurtengoa bigarren edizioa izango da, eta goizetik hasita errugbia barrutik zer den ezagutzeko jolasak, partidak eta errugbi munduan hain ezaguna den hirugarren zatia izango dira, musikaz lagunduta. Eguna borobiltzeko, Biok Txingudi taldeak Entente de la Nivelle-Bidasoa 18 urtez azpiko taldearen aurka partida bat jokatuko du.
“Egun handia prestatzeko lan gogorra egiten ari gara; pasa den urtean 60 parte-hartzaile izan genituen eta aurten kopuru hori are gehiago handitu nahi dugu. Hortaz, kirol egiten ondo pasa nahi duen edozein neska gazte edo heldu etortzera gonbidatuta dago”, adierazi du Alba Saiz Biok Txingudiko entrenatzaileak.
