E29ko ordutegiak aurreratuko dituzte Donostiako Ospitaleko langileen beharretara egokitzeko
Hondarribia eta Irun Donostiako Ospitalearekin lotzen duen autobus zerbitzuak 10 minutuko aldaketak izango ditu aurrerantzean.
Hondarribia eta Irun Donostiako Ospitalearekin lotzen duen E29 lineak ordutegi aldaketak izango ditu aurrerantzean. Hain zuzen, Hondarribitik eta Donostiako Ospitaletik egingo dituzten irteerak hamar minutuz aurreratuko dituzte; hala nola, Hondarribiatik 14:00etan eta 21:00etan, eta Donostiatik 13:15ean eta 20:15ean ateratzen direnak. Honela, ospitaleko langileek aukera izango dute euren sarrera eta irteera ordutegietara egokitzeko, baita garaiz iristeko ere.
Aldaketak uztailean egindako bileran adostu zituzten, Lurraldebus E29 linearen lehen urteurrenean. Osasun langileak Behe Bidasoako bi herrietako alkateekin eta Azahara Dominguezekin, Mugikortasuneko, Turismoko eta Lurralde Antolaketako diputatuarekin, batera egindako bileran bildu ziren. Bertan, ordutegiak berriro aztertzeko eskatu zioten diputatuari, eta diputatuak konpromisoa hartu du.
Aurrerantzean, Hondarribitik 13:50ean eta 20:50ean aterako dira; eta Donostiatik 13:05ean eta 20:05ean. “Beti defendatu izan dut garraio publikoa malgua izan behar duela, sortzen diren beharretara egokitzeko eta herritarrek eskaintzen dugun zerbitzuan erakusten duten konfiantzari erantzuteko”, azaldu du Dominguezek.
Bide beretik, Cristina Laborda Irungo alkateak 10 minutuko doikuntza honen atzean dagoena kontatu du: “Irunentzat hain garrantzitsuak diren gaietan aurrera egitea ahalbidetzen digu, hala nola gero eta erabilgarriagoa, erosoagoa eta pertsonen eguneroko bizimodura egokituagoa izango den garraio publikoa izatea”. Era berean, Igor Enparan Hondarribiko alkateak ere lantokira aukera jasangarria izatearen aukera nabarmendu du. “Garraio alternatibarik ez izatea ez dadila inoiz oztopoa izan lanpostu batera iristeko edo lan-aukera bati etekina ateratzeko”.
