Errotazar kalean igogailu bat jarriko dute irisgarritasuna hobetzeko
Katea auzoko igogailuak Errotazar kaleko 11., 13. eta 15. atarietarako eta ondoko plazarako sarbide segurua eta zuzena bermatuko du.
Irungo Udalak hiritarren mugikortasuna hobetzeko igogailu berria jarriko du Katea auzoan. Errotazar goialdeko irisgarritasuna hobetzeko obren kontratazioa onartu du. Honela, Errotazar kaleko 11., 13. eta 15. atarietako eta ondoko plazarako sarbide segurua eta zuzena bermatuko dute igogailuaren bidez. Igogailua jartzeko eskaera Alkatea auzoetan egitasmoaren bitartez jaso zuen udalak.
Egun, Errotazar eremu horrek irisgarritasunari dagokionez, lurraren maldagatik muga garrantzitsuak ditu eremuak. Kalearen goialdeko atarietara heltzeko bide luze eta deserosoak egin behar dituzte bizilagunek. Obra hauek oinezkoen joan-etorriak erraztuko ditu. Horretarako, igogailuarekin batera 9,50 metroko luzerako plataforma eraikiko dute. Igogailua espaloiaren ondoan kokatuko da, eta 7,50 metroko altuera gaindituko du. Ezaugarriei dagokienez, ontziratze bikoitza eta 13 pertsonentzako lekua izango du.
Bestalde, ondoko plazatxoan dagoen pilotalekura heltzeko sarbidea ere erraztuko dute. Egun, eskailera batzuk daude bertaratzeko; baina aurrerantzean, arrapala bat egingo dute irisgarritasuna errazteko. Lan hauek 530.000 euroko aurrekontua izango dute.
