Lehertu da festa Hondarribian
Haur danborrada 11:00etan abiatu da eta giro itzela jarri du herriko kaleetan zehar. Gero, 12:00etan, aurtengo omendu Ioseba Amunarrizek txupinazoa bota du.
Hodeitsu esnatu da eguna Hondarribian, baina eguraldiak ez du gelditu herritarren festarako gogoa. 11:00etan haur danborrada abiatu da Mendelutik. Ibilbidean zehar gero eta haur gehiago batu dira danborradara eta, noizbehinka euria egin badu ere, ateri dagoela iritsi dira Kale Nagusira. Bertan, giro itzela jarri dute haurrek eta udaletxe parean geratu direnean, Igor Enparan alkateak eta aurtengo omendu Ioseba Amunarriz Hondarribiko patroiak harrera egin diete. Gero, beraien ibilbidearekin jarraitu eta kalean gora joan dira haurrak.
Jarraian, Arma plazan, buruhandi eta erraldoien artean, hasiera eman diote jaiei urteroko txupinazoarekin. Amunarrizek bota du, eta orduan bai, orduan egin dute salto eta algara eta barre herritarrek. Hasi dira festak Hondarribian.
