Ioseba Amunarriz: "Garaipenak lortu ditut, baina inoiz ez nuke horrelakorik esperoko; ohore handia da"
Hunkituta eta pozez jaso du Urrezko Intsignia Ioseba Amunarrizek. Udaletxean egin diote omenaldia, senideez eta arraun munduko lagunez inguraturik. Hondarribiko patroiak "urte luzez egindako lana eta erakutsitako konpromisoa" nabarmendu dute.
Egun handia izan da gaurko irailaren 7a Ioseba Amunarrizentzat. Herriko jaietako txupinazoa bota ostean, udaletxean omendu dute bere senide, lagun eta arraun klubaz inguratuta “urte luzez erakutsitako lana, leialtasuna eta konpromisoagatik”. Udaletxeko arkupean agurra dantzatu diote lehendabizi Hondarribiko patroiari, eta jarraian, Igor Enparan alkateak eman dio Hiriko Urrezko Intsignia.
“Kirolak erakusten du garaipenak ospatzen direla, baina ikasi, porrotetik ikasten dela. Haizea alde duzunean gidatzea erraza da, baina itsasoa zakar dagoenean, patroiaren lana ezinbestekoa da, eta hori da gaurkoan Hondarribiak aitortu nahi dizuna”, hasi da alkatea. “Garaipen bakoitzaren atzean dagoen lana” goraipatu du Enparanek, izan negu hotza izan urduritasuna edota itsaso txarra. Halaber, patroiaren jaioterria eta horrek duen garrantzia nabarmendu du. “Hondarribik betidanik izan du lotura itsasoarekin, arraunarekin eta Ama Guadalupekoarekin. Belaunaldiz belaunaldi transmititu dugu herrian arraunaren kultura, eta zu, Ioseba, kultura horren parte zara”, esan dio Enparanek zuzenean Amunarrizi.
“Eredua” da Amunarriz, alkatearen hitzetan, txikitasunetik hasi eta goraino iritsi delako, bidean “lanaren, taldearen eta konpromisoaren balioa” erakutsi duen bitartean. Hondarribiarren izenean, eskerrak eman dizkio alkateak, “urteetan harro erakusteagatik herriaren izena itsasoan”. Hunkituta entzun ditu alkatearen hitzak patroiak. “Baina, denaren gainetik, eskerrik asko erakusteagatik gauzak egiteko modu batek ere uzten duela arrastoa”.
“Gaur ez dizugu beste estropada bat irabazteko eskatuko; gaur, gelditu, eta jaso ezazu herri honen maitasuna eta aitortza”, esan dio alkateak. Irribarretsu erantzun dio Amunarrizek lehen lerrotik. Jarraian, txalo zaparrada artean jaso du intsignia. Adi-adi entzun dio aretoak hunkituta eta urduri agertu den omenduari. “Hasteko, eskerrik asko udal zinegotzi, alkate eta Hondarribiko herriari. Niretzat ohorea da intsignia hau jasotzea”. Aitortu du txapelketa asko irabazita ere, “inoiz” ez lukeela horrelakorik esperoko.
Emozioarengatik kosta egin zaio hitz egitea, baina tente eutsi dio eskuz idatzitako diskurtsoari. Omendua bada ere, azpimarratu du jende asko dagoela horren atzean. Alde batetik, senideei eman dizkie eskerrak, “egunerokotasunean ondoan” izateagatik. Beste aldetik, arraunlariei, “hainbeste urtetan elkarrekin bizitako une ahaztezinengatik”. Gero, herritarrei, “elkartasuna garrantzitsua” dela erakusteagatik, eta baita arraun klubari ere, “beti zintzotasunez” aritzeagatik berarekin. Eta bukatzeko, emozioa ezin eutsirik, zendutako aitonari eskaini dio intsignia. Txalo zaparrada luzearekin erantzun dio aretoak.
