Jaietarako garbiketa zerbitzua indartuko dute Hondarribiko Udalak eta Txinzerrek
Zortzi egunetan 125 lanaldi gehiago jarriko dituzte martxan, eta edalontzi berrerabilgarriak salduko dituzte txosnetan. Bestalde, herritarren laguntza eskatu dute, edukiontziak errespetatu eta kaleak txukun mantentzeko.
Hondarribian ia dena prest dute iganderako. Txosnagunea eraikita, jaietarako azken ukituak ematen ari dira, tartean kaleen garbiketa prestatzen. Hondarribiko Udalak eta Txinzerrek, Txingudiko Zerbitzuak erakundeak, garbiketa zerbitzua indartuko dute, ostegun goizean egindako prentsaurrekoan azaldu dutenez. Abuztuaren 30ean jarri zuten martxan zerbitzu berria eta irailaren 12ra arte egongo da indarrean. Orotara, 125 lanaldi gehiago egingo dituzte Txinzerreko langileek.
Ofizialki festak igandean, irailaren 6an, hasiko dira, baina aurretik beste hainbat ekintza ere antolatu dituzte herrian. Ortzi Alonso zinegotziak prentsaurrekoan esandakoaren arabera, txupinazoa baino astebete lehenagotik hilaren amaierara bitarte, ehundik gora jarduera egingo dira herrian. Horrek nabarmen eragiten du kaleen garbitasunean, gero eta ekintza gehiago, orduan eta hondakin gehiago jaurtitzen direlako lurrera. “Gozatu ditzagun jaiak, baina errespeta ditzagun ingurukoak eta ingurunea”, esan du zinegotziak.
Garbiketa zerbitzua jada martxan badago ere, batez ere datozen egunetan indartuko dute. “Jaietan nabarmen areagotzen dira kaleko jarduerak eta Txinzer egokitu egiten da behar horietara”, azaldu du Txinzerreko kudeatzaile Leire Zubiturrek. Zortzi egunetan 125 lanaldi gehiago jarriko dituzte martxan, kaleak garbitu eta hondakinen bilketa eta banaketa egiteko. 52.000 euroko kostua suposatu du horrek guztiak.
Edalontzi berrerabilgarriak
Txinzerreko Hondakinen eta Hiri Garbiketaren Saileko arduradun Valentin Gonzalezek azaldu du zertan datzan zerbitzuaren indartzea: “Lantaldea goizean goiz hasiko da lanean gauean pilatutako zaborra biltzeko, erdigunetik hasi eta gero auzoak garbituta”. Bestalde, 15.600 edalontzi berrerabilgarri banatuko dituzte jaietan mugimendu gehien izaten den tokietan, adibidez, txosnagunean. Hala, herritarrek edalontzia euro baten truke erosi, eta behin erabilita, itzuli eta euroa bueltan jasoko dute. Gero, enpresa batek edalontziak garbitu eta berriro erabiltzeko prest izango dira.
Prentsaurrekoan bai Hondarribiko Udalak bai Txinzerrek hondakinak bereiztearen eta kaleak txukun mantentzearen garrantzia azpimarratu dituzte, gerora hondakinak itsasoan amaitu dezaketelako. Horregatik, herritarren laguntza eskatu dute. “Txinzer ahalegintzen da halako asteetan [jaietan] zerbitzua areagotzen, baina eskatu nahiko genuke jendeak zentzuz jokatzeko eta errespetatzeko jarritako edukiontziak”, esan du Zubiturrek.
