Irailaren 13ko mobilizazioa hizpide, Irungo Ernaik elkargunea egingo du Hondarribian ostiral arratsaldean
18:30ean txosnagunean elkartuko dira. Donostian egingo duten manifestazioa jorratuko dute gazteek, baina "ideia berriak" jasotzeko "espazio irekia" izango dela nabarmendu dute.
Datorren irailaren 13an Donostian egingo duten mobilizazio nazionala aitzakia izanik, gazte independentistek elkargunea antolatu dute ostiralerako, irailaren 4rako, Hondarribiko txosnagunean 18:30ean. Manifestazioaz jardungo dira, eta jatekoa eta mojitoak eskainiko dituzte. Gero, 20:00etan, Jaizkibel konpainiaren entsegura gerturatuko dira. Gazteen hitzetan, jaiak “saretuta” hasteko aukera izango da.
Asteak dira mobilizazio nazionala iragarri zuela Ernaik. Faxismoarei Ez lelopean irtengo da manifestazioa Donostiako Bulebarretik 13:30ean. Gazte antolakundeak aldarrikatu du egungo testuinguruan, “ezinbestekoa” dela borroka egitea, “Euskal Herria irabazteko”.
Mobilizazioaz jardungo dira ostiral arratsaldeko elkargunean, baina nabarmendu dute “espazio irekia” izango dela proposamen eta ideia berriak jasotzeko.
