Udalak lau zerbitzu berri jarri ditu martxan herritarrei arreta "osatuagoa" emateko
Gizarte arloko zerbitzuak indartu ditu udalak, eta dolua edota bakardadea lantzeko laguntza indibidualak zein kolektiboak egokitu ditu. Guztira lau zerbitzu dira eta egoitza berean kokatuta daude.
Hondarribiko Udalak prentsa ohar batean azaldu duenez, Gizarte Zerbitzuen Diru Zorroa sortu du, udal zerbitzuak indartu eta herritarrei arreta “hurbilagoa” eskaintzeko helburuarekin. Milioi bat euroko proiektua da, eta askotariko beharrak lantzeko zerbitzuak dira, hala nola bakardadea, dolua eta zaurgarritasuna.
Alde batetik, udal zerbitzuetan gehitu dira egoera zaurgarrian dauden adin txikikoei bideratutako laguntza psikosoziala eta arreta goiztiarra. Gazteekin jarraituta, udalak 2009tik etenda zegoen Prebentzio Komunitarioko zerbitzua berritu du, gazteekin egiten den “prebentzio lana” indartzeko.
Zerbitzuak soilik ez, udalak programa berriak ere sortu ditu. Alde aldetik, AuzoEKIN programa jarri du martxan, “zaintza eredu tradizionala” eraldatu, eta aukeratu gabeko bakardadea jasaten dutenei laguntzeko. AuzoEKIN jada martxan dago Mendelu, Amute-Kosta, Arkolla, Alde Zaharra eta Puntalea auzoetan. Udalaren azaldu du egitasmo desberdinen bitartez, adibidez, kafe tertuliekin, auzoetan sareak sortu direla, bizilagunen arteko harremana sustatzeko.
Eta beste aldetik, “Do, re, ni” programa sortu du, narriadura kognitiboaren prebentzioa landu eta dolua jasaten ari denari laguntzeko.
Egoitza komun bat
Zerbitzu eta programa berriak martxan jartzearekin batera, udalak Muliateko Gizarte Zerbitzuen espazioa egokitu du aipatutako zerbitzuak leku berean egoteko eta arreta “profesionalagoa” izateko. Egoitzara garraio publikoan iritsi daiteke, Kattalin Erauso kaletik ateratzen da autobusa.
Udalaren hitzetan, aldaketari esker herritarrenganako “arreta hobetuko” da: “Zerbitzuen arteko harremana errazagoa izango da, eta pertsona bakoitzaren beharrei ikuspegi zabalago batetik erantzuteko aukera izango dugu”.
