Larunbatean, 48. Guadalupeko Igoera egingo dute
Jai Nagusien baitan, tradizionala bihurtu den lasterketa antolatuko dute 10:30ean hasita; ostiralera bitarte izena emateko aukera izango dute.
Hondarribiko Jai Nagusiak anitzak dira, eta eskaintza zabala dute urtero. Kirolak ere badu zeresana herriko jaien baitan, eta urtetik urtera ehunka lasterkarik abiadura bizian egiten dute Guadaluperako bidea. Larunbat honetan, hilak 5, Jostaldi pilotalekutik Guadaluperaino dagoen 4,72 kilometroko bidea egin beharko dute, igandean hasiko diren festak berotzeko. Dagoeneko 200 korrikalari baino gehiagok izena eman dute lasterteketan. Super Amara BAT taldeak gogorarazi nahi die oraindik ere izena emateko epea irekita dagoela. Ostirala bitarte, 13:00ak arte, Kirolprobak webgunearen bitartez izena eman dezakete, 12 euroan. Lasterketaren egunean ere, izena emateko aukera izango dute 16 euroan.
Lasterketa 10:30ean hasiko bada ere, 09:00etatik 10:15era dortsala eta probako kamiseta jasotzeko aukera izango dute Jostaldi pilotalekuan. Bertan, kontsigna zerbitzua edukiko dute. Ibilgailu batek motxilak eta bestelako poltsak igoko ditu Guadalupera. Iragarpenei jarraituta, eguraldi ona espero da larunbaterako, eta giroa bikaina izatea espero dute antolatzaileek. Lasterketa amaitzean, txistorra, fruta eta freskagarriak banatuko dituzte helmugan.
Bestalde, etxeko txikienek ere zapatilak jantzi eta lasterkaldi laburra egin ahal izango dute. Urtebeteko hutsunearen ondoren, Guadalupe Txikia bueltan da. 1etik 13 urtera bitarteko haurrentzat izango da, eta adin tarte bakoitzak distantzia bat egin beharko du, Alamedan. 12:30ean hasiko dira probak harresiaren ondoan, txikienetatik gazteetara. Izen ematea doakoa izango da, eta Kirolprobak webgunearen bitartez zein lasterketa egunean egin dezakete.
