Ikasturte politiko berriak proiektu handiak eta eguneroko jarduerak uztartuko ditu
Alkateak ikasturte berriko agenda aurkeztu du; mugikortasuna, etxebizitza eta segurtasuna izango dira ikasturte berrirako erronkak.
Irungo Udalak hasiera eman dio 2026-2027 ikasturteari. Cristina Laborda alkateak ikasturte honetarako aurreikusitako agenda aurkeztu du, eta agerraldian adierazi duenez, hiriaren eraldaketan aurrera egiteko proiektu handietan zein eguneroko jardueretan fokua jarriko du. Hiru jarduera-eremu nagusi izango ditu ikasturteak: etxebizitza, mugikortasuna eta segurtasuna. “Irun aldatzen ari da, eta ikasturte berri honetan urrats garrantzitsuak egiten jarraitu nahi dugu, eraldaketa hori auzo guztietara iristeko eta pertsonen bizitza hobetzeko”, adierazi du.
Etxebizitzen auzia urte luzeko auzia da, baina argi eta garbi adierazi du ikasturte politiko berriko lehentasuna izango dela. Dagoeneko zenbait auzo eraldaketa prozesuan murgilduta dabiltza; hala nola, San Migel-Anaka eremua, Mendipe edota Korrokoitz. Guztira, 695 etxebizitza publiko eraikiko dituzte datozen urteetan. Beste alde batetik, Via Irunek hiriaren etorkizunerako egiteko garrantzitsua du: Plan Orokorraren aldaketa onartzearekin batera Erdialdeko eremu bat berroneratu eta aukera berriak sortzea ahalbidetuko duen proiektua sendotuko dute. “Irun, pertsonak bizitzeko, hazteko eta beren bizi-proiektua egiteko hiria izaten jarraitzea nahi dugu. Horretarako etxebizitza sortu behar dugu, baina baita gure auzoak eraldatzen eta berroneratzen jarraitu ere”.
Mugikortasunari dagokionez, tren eta autobus geltoki berriak agenda politikoa beteko du. Hiriaren eraldaketan “mugarri” izango da. Gainera, hiriko trafikoari eragingo dion Isuri Gutxiko Eremuaren ordenantza behin betiko onartzea aurreikusi du alkateak. “Hiri-proiektu bat da, baina Irunen bizi, lan egin edo etortzen direnen bizitza errazteko proiektu bat ere bada”, azpimarratu du.
Azkenik, segurtasunaz ere hitz egin du Labordak. Udaltzaingoaren plantilla handitzeaz gain, eredu berria ezarriko dute. Honen guztiaren helburua hiriko inguruak hobetzea du helburu, hau da, herritarren erabilerarako espazioak berreskuratzea eta auzoak zainduagoak eta aktiboagoak izatea.
“Jarduera horiek guztiek funtsezko babesa izango dute 2027ko Udal Aurrekontuetan”. Datorren urteko aurrekontuek auzoen eta auzotarren beharren esanetara egon beharko dutela esanez amaitu du agerraldia.
