Hondarribiko gazteek festak aurreratuko dituzte
Hondarribiko kuadrillek hitzordu garrantzitsua dute bihar: Gazte Eguna da. Festaz gain, orain dela 50 urte Guardia Zibilak tiroz hildako Josu Zabalari omenaldia egingo diote.
2024ko Gazte Eguneko irudi bat. Bihartik jada festa usaina izango da Hondarribian, atariko zenbait ekitaldi izango baitira. Baina benetan motorrak berotuko dituztenak herriko gazteak izango dira. Gazte Eguna egingo dute bihar dozenaka eta dozenaka lagunek, behar bezala noski, egun osoko egitarau-festa batekin. Ez da dena festara mugatuko, omenaldietarako ere tartea izango baita. Josu Zabala oso presente izango dute biharkoan, Guardia Zibilak tiroz hil zuenetik 50 urtera omenaldia eskainiko baitiote. 12:30ean izango da hori, portuan.
11:30ean hasiko dute egun handia, jokoekin. Omenaldiaren ondoren, 14:30ean bazkari herrikoiak hartuko du Alameda. Jarraian, eta horretarako gai direnek, bingoan parte hartuko dute (16:30). 18:15ean aldakak mugitzeko unea helduko da, Zaratak erromeria eskainiko baitu bertan. 22:30ean elektronikak hartuko du lekukoa, DJ-ak izango baitira, nork daki noiz arte.
Indarkeria matxisten kontrako prebentzioa
Udalak, biharko Gazte Egunarekin bat eginez, indarkeria matxistaren kontrako prebentzio eta arreta neurriak indartuko ditu bihar gauean. Arreta eskaintzeko telefono zerbitzua ere martxan izango da. Gaueko 23:00etaik 8:00etara indarkeria matxsita egoerak artatzeko eta salaketak bideratzeko telefono zerbitzua izango da erabilgarri, 688 71 87 97 telefonoan. Era beran, erasoen aurrean laguntza eskatzeko edo gertakarien inguruko abisua emateko ondorengo telefonoak ere eskuragarri daude: SOS Deiak (112), SATEVI (900 840 111), Hariberria, sexu indarkeria (900 840 188) eta Udaltzaingoa (943 11 13 13).
