Hobekuntzekin hasiko dute ikasturte berria Irungo sei ikastetxek
Elatzetan, Dunboan, Belaskoenean, Toki Alai, Lekaenea eta Txingudi Ikastolan zenbait lan egiten ari da udala, udako oporraldia probestuz.
Udako oporraldia probestuz, Irungo Udala hiriko ikastetxe publiko batzuk hobetzeko lanetan ari da. Sei ikastetxetan aritu dira lan horiek egiten, hain zuzen, Elatzeta, Dunboa, Belaskoenea, Toki Alai, Lekaenea eta Txingudi Ikastolan .
Sandra Caballero Hezkuntza saileko ordezkaria eta Gorka Alvarez Obretako, Mantentze Lanetako eta Azpiegituretako saileko ordezkariak obren gaineko xehetasunak eman dituzste, Elatzeta ikastetxean izan dira. “Jarduketa hauek finkoak dira jada gure plangintzan. Hala, udako oporrak baliatzen ditugu ikastetxeak hobetzeko, eraberritzeko eta mantentzeko, ez baitago klaserik. Gure eskumenen baitan jarduten dugu, hiriko espazio eta zerbitzu publikoak ahalik eta egoera onenean daudela bermatzearren. Gauza berbera egiten dugu ikastetxeekin; izan ere, alde batetik, bertan hazten dira Irungo hurrengo belaunaldiak, eta besteitk, instalazio horiek auzoen behar sozialak ere estaltzen dituzte”, esan du Alvarezek.
Caballerok, bestalde, ikastetxeekin “harreman hurbila eta etengabekoa” dutela esan du: “Behar bakoitza obren proposamen teknikoekin batera aztertu eta baloratzen da, gauzatu beharreko esku hartzeak zehazteko. Garrantzi handiko esku hartze horiei guztiei gehitu behar zaizkie urtean zehar egiten diren mantentze lanak”.
Uda honetan egindako lanetarako 451.254,46 euroko inbertsioa egin du udalak, honako lanak egiteko:
- Elatzetan, Haur eta Lehen Hezkuntzako patioa hobetzeko lanak egingo dira.
- Dunboan, Lehen Hezkuntzako eraikinean, beheko solairuko bainugelak eraberrituko dituzte.
- Belaskoenean, Haur Hezkuntzako eraikinean, beheko solairuko bainugelak eraberrituko dituzte.
- Toki Alai, Lekaenea eta Txingudi Ikastolan, Lehen Hezkuntzako eraikinetan, euskarriak prestatuko dituzte eta hainbat gela margotuko dituzte.
- Lekaenean, patioa egokitzeko proiektua idatziko da.
