Gizon bat atxilotu dute Irunen, sexu erasoa, legez kanpoko atxikitzea eta lesio delituak leporatuta
40 urteko gizon bat atxilotu dute Udaltzaingoak eta Ertzaintzak Irungo prostituzio etxe batean. Sexu erasoa, legez kanpoko atxikitzea eta lesio delituak leporatu dizkiote.
40 urteko gizon bat atxilotu dute Udaltzaingoak eta Ertzaintzak Irunen, bertako prostituzio etxe batean, sexu eraso bat egitea egotzita. Astelehen (hilak 24) arratsaldean izan zen erasoa, prostituzio etxeko alarma gelak abisu bat jaso eta poliziei dei egin zieten. Bertaratzerakoan jakin zuen poliziak gizonak sexu erasoa egin ziola 27 urteko emakume bati. Horrez gain, eraso egindako lekuan emakumea atxiki zuela ere jakin zuten agenteek.
Eraso gehiago leporatu dizkiote gizonari. BERRIAk jakin duenez, lekukoen arabera, 24 urteko emakume bat jo zuen gizonak saihetsean, biktimari laguntzera joan zenean.
Bertan atxilotu zuten gizona, sexu erasoa, legez kanpoko atxikitzea eta lesio delituak leporatuta. 12:000 atzeman zizkioten atxilotzerako garaian. 40 urteko gizona preso dago orain, epailearen esku geratzeko zain.
Udalaren gaitzespena
Irungo Udaleko Berdintasun Sailak ohar bat kaleratu du eraso matxistaren harira. Erakundeak “gaitzespen gogorrena” azaldu du eta “bere laguntza nahiz begikotasun osoa” adierazi nahi izan die erasoa jasan duen emakumeari eta haren ingurukoei. Eskura dituen informazio eta baliabide guztiak emakumearen esku utzi ditu udalak, “baita bere onera etortzeko prozesuan behar izan dezakeen laguntza guztia ere”.
Erasoaren berri izan dutenetik informazioa egiaztatu, erkatu eta zabaldu ondoren, emakumeen kontrako indarkeria erantzun publikoa emateko protokolo instituzionala aktibatu zuen erakundeak. Honako erabakiak hartu ditu udalak: batetik, Batzordearen jarrera irmoa adieraztea, “argi eta garbi esateko ez ditugula inola ere onartzen emakumeen eskubideak urratzen dituzten eraso makur hauek”, eta, bestetik, herritar guztiei bide bat eskaintzea, “gaitzespen argi bat agertu dezaten emakumeen kontrako indarkeriaren aurka, indarkeria ez baita soilik erasoa pairatzen duten emakumeen arazoa, baiziki emakume guztiena”.
Honakoa da, hitzetz hitz, alderdi guztiek adostutako oharra:
“Irungo Udaleko Berdintasun Batzordeak gertaeraren berri izan duenetik eta erasoari buruzko informazioa egiaztatu, erkatu eta zabaldu ondoren, emakumeen aurkako indarkeriari erantzun publikoa emateko protokolo instituzionala aktibatu du informazioa baloratzeko eta, biktimari edo bere gertukoei egokia den arreta eman ahal izateko, beharrezkoa den koordinazioa ziurtatzeko. Arreta egokia bideratu dela ziurtatu eta informazioa baloratu eta gero, Irungo Udaleko Berdintasun Batzordeak hurrengo erabakiak hartu ditu: alde batetik, Batzordearen jarrera irmoa adieraztea, argi eta garbi esateko ez ditugula inola ere onartzen emakumeen eskubideak urratzen dituzten eraso makur hauek; eta, bestetik, herritar guztiei bide bat eskaintzea, gaitzespen argi bat agertu dezaten emakumeen aurkako indarkeriaren aurka, indarkeria ez baita soilik erasoa pairatzen duten emakumeen arazoa, baizik emakume guztiena. Emakumeen aurkako indarkeriak erasotzaile eta biktima banakakoak ditu beti, noski, baina arazo sakon bat dauka jatorrian: emakumeak kontrolpean eta mendean izan nahi dituen ideologia. Beraz, indarkeria hori ez da ekintza bakartuen edota azalpenik gabeko gertakarien emaitza. Aitzitik, generoen gaineko aurreiritziak, gizartean aski errotuta dauden horiek dira, hain zuzen, halako ondorio larri eta tamalgarrien sortzaile. Emakumeak desberdintasun eta menpekotasun materialeko egoera batera, bizitza prekario batera behartzen ditu gizartearen antolamenduak. Ez ditu herritar osotzat hartzen, gizonezkoen maila berean, eta ez die aukerarik ematen oinarrizko eskubideen jabe izateko.
Irungo Udalak, Berdintasun Batzordea osatzen duten elkarte feminista eta/edo emakume elkarte guztien bidez: Uxoa, Argoiak, Gaurko Andreak, Bidasoaldeko Elkarte Feminista, Irungo Emakumeen Etxea Elkartea / Asociación Casa de las Mujeres de Irun, Txingudiko Elkarte Feminista y KERA, ardura osoa du udalerrian bizi garen pertsona guztiok eskubide guzti-guztien jabe garela bermatzeko. Beraz, ez du atsedenik hartuko ahalegin honetan, gure bizikidetza demokratikoaren oinarriak auzitan jartzen dituen arazo sozial larri honen irtenbidea bilatu beharra baitago guztion artean. Langintza horren barruan, ezinbestekoa da adierazpide egokiak eskaintzea Irungo herritarrei, oro har, emakumeen aurkako eraso guztiak irmotasunez gaitzetsi ditzaten. Erasoa jasan duten emakumeek guztion laguntasuna sentitu behar dute, ikusi behar dute guztion erantzukizuna eta ardura dela haiei laguntzea, eta erasotzaileei argi eta garbi azaltzea guztion artean mugatu egingo dugula beldurra hedatzeko estrategia zital horren ahalmena, emakumeei erantzun tresna egokiak emanez, eta gizon erasotzaileei, berriz, ekintza makur horien ondorioak ordainaraziz”.
