'Emakumeak txirrindan' programan izena emateko aukera, zabalik
Irailaren 16tik 22ra egingo den Europako Mugikortasun Astearen harira, Hondarribiko Udalak hainbat jarduera antolatu ditu "mugikortasun eraginkor eta aktiboa sustatzeko" asmoz.
Irailaren 16tik 22ra egingo den Europako Mugikortasun Astearen harira, Hondarribiko Udalak hainbat jarduera antolatu ditu “mugikortasun eraginkor eta aktiboa sustatzeko” asmoz. Horien artean aurki daiteke ‘Emakumeak txirrindan’ hastapen ikastaroa. Emakumeei zuzendutako ikastaro honetan partaideei “bizikletan modu autonomoan eta seguruan ibiltzeko beharrezko tresnak eta trebetasunak” eskaniko dizkiete.
Norberaren erritmo eta mailara egokitutako saioak izango dira. “Elkar zaintzan, konfiantzan eta babes giroan oinarritutako talde batean, emakume bakoitzak bizikletan ibiltzeko segurtasuna eta autonomia irabaztea da ikastaroaren helburua”, aipatu du Estitxu Urtizberea zinegotziak. Nabarmendu duenez, ikastaro hau II. Berdintasun Planean jasotako 124 ekintzetako bat da.
Bi orduko lau saio izango dira, irailaren 17an, 24an eta urriaren 1ean eta 8an, 18:00etatik 20:00etara. Izena eman beharko da parte hartzeko, lotura honetan. Zaintza zerbitzua ere eskainiko dutela aurreratu du udalak.
Bizikletan ibiltzen ikasteko ikastarotik harago, zenbait egitasmo ere izango dira aste horietan, honakoak:
- Irailak 17: Zergatik txirrindaz ez? hitzaldia eskainiko du Igone Mariezkurrena txirrindulari eta bidaiariak (18:00etan, Kultur Etxean).
- Irailak 18: Tipi-tapa ibilbaldi osasungarria egingo dute Itsas Etxetik abiatuta (11:00etan).
- Irailak 20: Bizikleta martxa eta auzo jaia. 10:30ean abiatuko da martxa Gernikako Arbola plazatik eta Mendelun bukatuko du ibilbidea. Bertan, festa izango da, dj-ak, puzgarriak, aurpegi margoketak, jokoak eta beste hainbat jarduerekin.
Mugikortasun Asteari lotuta, aste horretan San Gabriel, Beterran eta Uliazpi egoitzeko egoiliarrek trizikloan ibilbideak egingo dituzte herriko kaleetan barrena.
