Etzakit eta Pantxoa eta Peio, jaiak biribiltzeko
Hondarribiko Jai Nagusietan ariko dira bi taldeak, urte luzez oholtzak alde batera utzi ondoren. Irailaren 8 eta 11n izango dira emanaldiak.
Pantxoa eta Peio, artxiboko irudi batean. Joan den uztail bukaeran iragarri zituen Hondarribiko Udalak aurtengo jaietako kontzertuak, eta orain, egitaraua osatu eta biribilduko duten beste bi kontzertu iragarri ditu erakundeak: Etzakit eta Pantxoa eta Peiok ere kontzertu bana eskainiko dute herrian. Orotara, 15 kontzertu izango dira aurtengo festetan.
Izen handiko bi talde hauek herrira ekartzea “bereziki pozgarria” dela aipatu du Ortzi Alonso Kultura zinegotziak: “Bi proposamenek gure musikaren historian izan duten garrantziagatik bereziki pozgarria da Etzakit eta Pantxoa eta Peio bezalako izenak egitarauan txertatzea, baina baita itzulera hauek Hondarribian bizi ahal izango ditugulako”. Bi taldeak urte luzez aritu baitira oholtzetatik urrun, eta orain dela gutxi berrekin diote haien musika Euskal Herriko herrietan zuzenean eskaintzeari.
Irailaren 8an izango da Etzakit-en kontzertua, Bentan. 1990ko hamarkadan eragin handia izan zuen taldeak Euskal Herriko musikaren eszenan. Hernanin sortu zen taldea, eta hamarkada batez zientoka emanaldi eskaini zituen, 2000. urtean etenaldia iragarri arte. Aurten, 26 urteren ondoren, oholtzetara itzuli da, horien artean, Hondarribikora.
Bestalde, Pantxoa eta Peioren emanaldia irailaren 11n izango da, hau ere Bentan. Euskal kantagintzaren historiako izen garrantzitsuenetarikoak dira biak. Lapurdiko bikoteak 1970ko hamarkadan ekin zion ibilbideari, eta jada euskal kulturaren parte diren hainbat abesti sortu zituzten, belaunaldi askok iltzatuta dituztenak. 2011n etenaldia iragarri zuten, eta aurten itzuli dira, Azken Dantza izeneko birari esker. 2027ko uratrrilean bukatuko dute bira berezi hori.
