Jaizubiko jendeak badaki ongi pasatzen
Jaizubiko jaiak hastear daude. Urteroko hitzordu handia da auzotarrentzat, eta hurbiltzen diren beste herritarrentzat. Musika, jokoak, bertsoak, bazkaria, suak... denetarik izango dute.
Gaur hasiko dira Jaizubiko Jaiak. Gaur emango diote auzoko jaiei hasiera, txupinazoarekin batera. Hondarribiko auzo askok ez dute haien jaiez disfrutatzeko ohitura, baina Jaizubian bai, eta nola gainera. Auzo guztia elkartzeko xedearekin, eta haien programazioa denekin zabaltzeko asmoarekin, gaur eta bihar topera izango dira auzotarrak. 19:50ean botako dute txupinazoa, eta hortik aurrera, bihar gauera arte, denetarik izango dute.
Txupina bota ondoren, etxeko txikienek hartuko dute protagonismoa. Haur jokoak izango dituzte, eta pottoka gainean ibiltzeko aukera baita ere. Jatekoa eta edatekoa ere izango dute txikienek, 18:00etatik aurrera txokolatada izango dute eta. Baina helduentzat ere gaur badira gauzak. Bi txapelketa izango dira gaur. Bat, tokarena, eta bestea, truk txapelketa. Gaur bertan irekiko dute izen ematea, tokarena 18:00etan eta trukarena 19:30ean. 20:30ean Trikitrio hirukoteak alaituko du giroa, eta azkenik, zezen suzkoa izango dute 22:00etan.
Baina egun handia biharkoa izango da. Ez dute denbora galduko, eta 08:00etan jada dianarekin hasiko dute eguna. Ondoren, 09:45ean meza egingo dute, eta 10:30ean salda banatzen hasiko dira. Kirola eta kultura uztartzerarren, bertsopelota egingo dute, Sustrai Colina eta Nerea Elustondo bertsolariekin batera. 12:25ean barraskilo lasterketa, eta 14:00etan bazkaltzera. Euskal Parrilla enpresaren eskutik bazkaria egingo dute, menu ederrarekin. Hegaluzea eta oilaskoa parrillan, enbutidoak… ederki geratuko dira auzotarrak.
Egunarekin jarraitzeko eta bazkaria luzatzearren, 16:00etan bingo musikatua. 18:00etan herri kirolak, eta 20:00etan, berriro ere Trikitriok girotuko du ilunabarra. Eguna bukatze aldera joango da, eta 22:00etan errifen zozketa egingo dute, eta 22:30ean zezen suzkoa. Donostian bezala, suak ez dira faltako, 23:00etan botako dituzte eta. Azkenik, Bingo Nocturno, iragarri dutenez, 23:30eatik aurrera.
