Ama Xantalen eguna ospatzeko, ermita zabalik
Xantalen eguna datorren asteartean, hilak 18, bada ere, Alde Zaharra - San Juan auzo elkarteak larunbatean ospatuko du hainbat jardueren bidez.
Alde Zaharra – San Juan Auzo Elkarteak Xantalen eguna ospatuko du etzi, hilak 15, eta hainbat jarduera antolatu ditu goizerako. Xantalen eguna hilaren 18an, asteartearekin, den arren egun batzuk aurreratuko dute eta larunbatean zein igandean Ama Xantalen ermita zabalik egongo da, 10:00etatik 20:00etara. Ondare arkeologikoaren aztarnategia ikusteko ate irekien jardunaldia egingo dute. Gainera, igande eguerdian, Irun Hiria Musika Bandak kontzertua eskainiko du, Urdanibia plazan.
Larunbatean, 09:00etan, Irungo Txistulari Taldeak goiz eresia egingo du auzoan barrena. Oiasso txarangak ere parte hartuko du, eta Esteban Velasco maisuak 2019an auzorako konposatutako Xantalen Diana interpretatuko dute. 11:30ean, Atzokoak abesbatzarekin Xantalen eguneko meza egingo dute, eta hura amaitu eta berehala, 12:15ean, XIII. Txapelaundi Sariak banatuko dituzte. Goiza borobiltzeko hamaiketakoa eskainiko diete hurbildu diren guztiei.
Txapelaundi Sariak auzoko bizilagunen ekarpena aitortzeko sariak dira, auzoa bizitzeko leku hobea izan dadin. Aurtengo saridunna Kale Nagusiko Mayi izango da. “Bizilagun honek bizitza osoa eman du auzoan, auzoko ekitaldiak antolatzen, eta oro har, bizilagunak laguntzeko prestutasuna erakutsi du, beti”.
Bestalde, udalak gogorarazi du Oiasso Museoak larunbatero Ama Xantalen ermita ikusteko bisita gidatuak antolatzen dituela: 11:00etan gaztelaniaz eta 12:30ean euskaraz. Irun Erromatarra bisitan parte hartzeko aldez aurreko hitzordua eskatu beharko dute, 943 63 93 53 telefonora deituta. Helduek 5,75 euro ordaindu beharko dute; haurrek, aldiz, 4 euro. Sei urtetik beherako haurrak, doan.
