Pikoketako fusilatuak oroitu dituzte
Gaur, 90 urte bete dira tropa faxistek 20 errepublikar exekutatu zituztenetik; Blaiako hilerrian bost minutuko isilunea egin dute udal ordezkariek eta biktimen senideek.
90 urte pasa dira 1936ko abuztuaren 11n tropa faxistek Pikoketan 20 lagun fusilatu zituztenetik. Hildakoak Irungo Gaztedi Komunistako zein karabineroak ziren, eta urtero legez, gaurko egunez, omenaldia egin diete Blaiako hilerrian. Ekitaldian, udal ordezkariak, Kepa Ordoki Memoria Historia Bidasoan, Nicolas Gerendiain Irungo Errepublikarrak eta biktimen senideak bildu dira, eta guztiek bost minutuko isilunea egin dute hildakoen omenez.
Fusilatuak lurperatuta dauden panteoian lore eskaintza egin dute, eta erabateko isiltasunean gertakari lazgarria oroitu dute. “Abuztuaren 11 egun berezia da hiriaren historian. 1936an gizon zein emakume tropa faxisten aurka borrokatu zuten, demokraziaren alde. Horiek oroitzeko gaur hemen elkartu gara, garrantzitsua da balore demokratikoak oroitzea eta justizia eskatzea”, adierazi du Cristina Laborda alkateak.
1976an, Marcelo Usabiagak, fusilatutako Bernardo Usabiagaren anaiak, hobi komuna kokatzeko lanak hasi zituen, frankismo garaian hildakoen hobia desagertuta egon baitzen. 1978an, hobiak aurkitu eta gorpuak desobiratu zituzten Blaiako panteoian lur emateko. Urte hartatik gaurdaino, abuztuaren 11n, omenaldia egiten diete fusilatutakoei hilerrian.
HITZA omenaldian izan da, eta honako argazkiak atera ditu:
